Соседите чекаат Скопје да ги фати убијците
Во српското и косовското МВР молчат со какви сознанија располагаат за злосторството кај Смилковци
Горан Адамовски
Косовските и српските разузнувачи следат што се случува во Македонија, но не сакаат да коментираат ништо околу петкратното убиство кај Смилковското езеро во Скопје, што го згрози Балканот и пошироко. Што презеле од своја страна, дали можеби имаат сознанија, кои можат да и' помогнат на истрагата? И во двете министерства изразуваат загриженост од злосторството, кое може да предизвика немири во целиот регион, но молчат, оставајќи ги македонските колеги да ја завршат истрагата.
Македонското Министерство за внатрешни работи побара помош од соседните земји, нивните полиции и разузнувачки служби, но засега, освен декларативна, не добија конкретна поддршка.
„Слушнав за тоа, но немам информации дека барањето за помош стигнало до нас. Во секој случај, ние сме загрижени, би сакале да се откријат сторителите и нарачателите на ова злосторство и доколку биде побарано од нас, тука сме да помогнеме на кој било начин“, ни изјави Јован Стоиќ, шеф на кабинетот на директорот на БИА (Безбедносно-информативна агенција) или Државната служба за безбедност на Србија.
Оттаму со резигнираност демантираат било каква поврзаност со петкратното убиство. За се' друго, односно дали имаат сознанија дека бруталните убијци побегнале на територијата на Косово или во Србија - немаат коментар. Пред неколку дена, тамошниот министер за внатрешни работи, Ивица Дачиќ се понуди за помош, потврдувајќи дека српската полиција веќе собира сознанија околу случајот.
Ниту во Министерството за внатрешни работи во Приштина не се расположени да зборуваат за случајот. Откако ги сослушаа нашите прашања, само кусо ни рекоа дека за сите информации треба да се обратиме во македонската полиција.
Нема нови моменти во истрагата што се води во Скопје, потврди вчера Иво Котевски, заменик-министер за односи со јавност. Се анализираат досегашните докази, се проверуваат видео-снимките, се прибираат сознанија, кои би можеле да ги однесат инспекторите на прав пат. Досегашните сознанија велат дека најмалку тројца убијци со автомобил дошле од надвозникот кај селото Смилковци и се спуштиле кон езерото. Четирите момчиња на возраст од 18 до 21 година се подготвувале да си заминат кога биле застрелани. Стотина метри понатаму, убиен бил и петтиот рибар од Црешево, кој ги видел свирепите убиства, извршени за помалку од десет минути со три автоматски пушки.
Кој и зошто ги убил Кире Тричковски, Филип Славковски, Александар Наќевски, Цветанчо Ацевски и Борче Стефковски, се' уште е мистерија.
Вчера, во гимназијата „Арсени Јовков“ се оддржа комеморација за матурантот Александар Наќевски. Во истото училиште учи и неговата сестра.
Во недостиг од официјални информации, во оптек се разни шпекулации околу мотивите за убиствата. Под сомневање е и можноста полицијата да ги фати убијците.
Дума: момчињата не биле тепани
„Момчињата не биле тепани пред да бидат убиени“, потврди уште еднаш д-р Алексеј Дума, директор на Институтот за судска медицина во Скопје. Иако резултатите од обдукцијата покажаа дека смртта кај скопјаните настапила од огнострелни повреди, а на нивните тела не биле забележани друг вид повреди, дел од медиумите во Белград објавија дека момчињата најпрво биле тепани и малтретирани, а потоа застрелани.
„Апсолутно не е точно тоа. Имаме докази, фотографии и обезбеден материјал, со кој можеме да се соочиме со било кого. Слободно може да се побара второ мислење, подготвени сме да ги анализираме нашите наоди со соодветни експерти од страна“, ни изјави вчера д-р Дума.
Резултатите од обдукцијата се испратени во полицијата. Експертите од Институтот го завршија својот дел од задачата, иако се случува МВР да побара поситни вештачења, кои се завршуваат веднаш.
Како што беше објавено кратко по убиствата, куршумите имале голема брзина и сила. Само еден куршум е најден во тело на една од жртвите. Некои од убиените имале по три, четири, па дури и шест рани. Во нив било пукано и од напред и од позади. Најголем дел од повредите биле во горниот дел од телата. Причината за смрт кај сите е директна последица на оштетување на важни витални органи. „На телата на починатите не се најдени друг вид повреди, во смисла, механички други повреди нанесени пред или после смртта“, соопшти тогаш Биљана Јаневска, водачот на тимот, кој работеше на обдукцијата на телата на убиените. (Г.А.)
СДСМ бара политичка одговорност за „Смилковци“
Опозицијата бара политичка одговорност за петкратното убиство кај Смилковци и за акцијата „Детонатор“.
„Изминува неполн месец од почетокот на ’Детонатор’ и 11-ти ден од грозоморното петкратно убиство кај скопско ’Смилковци’. Ова е период во кој јавноста со право бара политичка одговорност за првите луѓе во посочените институции, затоа што или знаеле или морале да знаат за се' што се случува во нивните ресори“, изјави вчера потпретседателот на СДСМ, Гордан Георгиев. Тој додаде дека време за политичка одговорност секогаш има и уверува дека кога ќе дојде време таа ќе биде покрената.
СДСМ констатира дека во врска со “Детонатор“, на територијата на половина од државата, полицијата наместо да го спречува го штитела и организирала криминалот. А, државните институции, како што беше речено, замижувале пред се' што се случувало во коцкарниците.
За петкратното убиство кај Смилковци, СДСМ смета дека е оправдано општото мислење дека затаиле превентивните механизми на државниот безбедносен апарат кои не успеале навремено да го спречат овој грозоморен чин. „Сепак, свесни, за чувствителноста на моментот, ги повикуваме сите граѓани за трпение и целосна подршка на институциите за што поскоро расветлување на петкратното убиство, пронаоѓање на злосторниците и нивно соодветно казнување“, изјави Георгиев. (П.Р.)
http://utrinski.com.mk/?ItemID=DBA65BC68BAF4A4BB0BEEFA89A186BD2
