Соседите добро профитираат од армиите, ние бистриме политика
За разлика од стратегијата за заработувачка, која очигледно ја спроведуваат генералите во Софија и во Белград, нивните колеги во Скопје се чини дека работат многу дефокусирано во овој дел и се окупираат повеќе со политика отколку со активности поврзани со продуктивни безбедносни активности
Регионот преку војската добро ги полни буџетите
Додека соседните земји профитираат од знаењето на нивните армиски кадри и заработуваат од капацитетите на својата наменска одбранбена индустрија, Македонија се чини дека назадува во овој процес и ја оптоварува својата војска со маргинални задачи.
На исток од Македонија, соседна Бугарија, во соработка со Америка, на пример, најверојатно ќе има голема корист од обуката и тренингот на 7.000 припадници на либиските сили за безбедност и на силите за специјални операции на оваа земја што би учествувале во контратерористички мисии, пишува „Њујорк тајмс“.
Неименуван американски претставник на власта во разговор, пак, за „Ројтерс“ изјавил дека САД планираат да ги обучат овие војници во наредниов период во Бугарија, а бугарскиот министер за одбрана го потврди овој чин во септември годинава и најави дека либиските сили ќе учат да станат професионални војници во следните осум години.
На север, пак, Србија изменаџира одлична воена соработка со Русија и најави дека во наредниот период нејзините воено-одбранбени капацитети тесно ќе соработуваат со оние на Кремљ, за потоа заедно да излезат на пазарот за воена опрема. Од потпишаниот договор се очекува двете земји добро да заработат, имајќи го предвид фактот дека Москва го зазема второто место, веднаш зад Вашингтон, во светот за продажба и профит од воена технологија.
Софија и Белград како пример
За разлика од стратегијата за заработувачка, која очигледно ја спроведуваат генералите во Софија и во Белград, нивните колеги во Скопје се чини дека работат многу дефокусирано во овој дел и се окупираат повеќе со политика отколку со активности поврзани со продуктивни безбедносни активности. Неделава медиумите пренесоа информација дека вработените во Генералштабот на Армијата и во Министерството за одбрана ќе учат албански јазик. Весниците и телевизиите во своите текстови и прилози напоменаа дека надлежните во војската не им дале ни објаснување за тоа која е потребата командниот состав на војската и вработените во одбрана да учат албански. Минатиот месец армијата беше во фокусот на медиумите, пред сѐ поради вработувања и унапредувањата врз основа на партиската припадност и Бадентер.
Стручната јавност во земјава тврди дека АРМ во последно време повеќе личи на македонското собрание отколку на една современа војска. Експертите се децидни дека во одбраната и во армијата нема место за политички импровизации и во нашата војска едноставно има место само за професионализам и нема место за политика, бидејќи на политичарите работата им е во Собранието и на јавната сцена. Ако продолжат вака да се однесуваат првите луѓе на војската, тие треба да носат цивилни костуми, а не воени униформи.
Токму оваа иста армија, на која сега ѝ се случуваат вакви ситуации, никогаш досега не била на чекор да го уништи имиџот што со години го градеше и стекна солидно реноме преку успехот на мисиите во странство. Токму оваа и ваква АРМ во сите досегашни анкети на кое било прашање од различни агенции и институции што го проверуваа јавното мислење уживаше неоспорен статус и доверба во општеството.
Да се мотивираме да заработиме повеќе
Безбедносниот експерт, професорот Стојан Кузев, вели дека вестите за постигнувањето на секторот одбрана во Бугарија и во Србија треба да се примат во Македонија како мотиваторски, што значи дека дополнително треба да се форсираме и да се ангажираме за да успееме да донесеме некој денар повеќе во нашиот буџет.
- Ние декларативно многу нудиме, а практично малку заработуваме во ова поле, за разлика од соседите. Ние имаме еден куп пишани документи и стратегии во безбедноста, на пример, за заработувачка од воениот полигон Криволак, но тие никако да се остварат во полн капацитет - објаснува Кузев.
Тој истакнува дека не му е јасно како армијата не може да заработи од еден ваков армиски капацитет како што е Криволак, кој е од светски ранг.
- Мислам дека министерот за одбрана и началникот на Генералштабот, според овие работи што ги гледаме и ги слушаме во медиумите, се повеќе окупирани со решавање на политичките прашања и нивна меѓусебна битка отколку со работење на продуктивни проекти и со решавање на вистинските прашања на одбраната - вели Кузев.
Професорот резимира објаснувајќи дека Владата треба да ја зголеми својата цивилна контрола врз АРМ и Министерството за одбрана и еднаш засекогаш да ги поправи овие случувања, кои го рушат интегритетот на нашата војска.
Со него се согласува и универзитетскиот професор и експерт во безбедноста Стојан Славески, кој, пак, смета дека Македонија иако заработува од своите капацитети обучувајќи ги воените лица во Косово и во Црна Гора, сепак би требало да се ангажира дополнително на ова поле.
- Ние сме мала земја и имаме мала армија, па затоа реално не можеме да се однесуваме како нашите соседи и да склопуваме зделки со суперсилите како Русија и Америка, како што прават Белград и Софија, но затоа мораме тоа да го правиме со другите светски играчи што не се од овој калибар - објаснува професорот.
Тој истакнува дека во ваква една ситуација, кога едноставно немаме избор, мораме да ги исфрлиме политиката и партизацијата од војската и да се бориме да придобиеме колку што е можно повеќе „клиенти“, од кои би заработувале нашата одбранбена индустрија, АРМ и образовните институции од овој тип.
http://www.novamakedonija.com.mk/NewsDetal.asp?vest=112213836506&id=9&prilog=0&setIzdanie=23034
ова се е излишно/
