Наместо војската, цивили печалат од имотот на АРМ
СЕ ПРОДАВААТ КАРАУЛИ, МАГАЦИНИ И КАНЦЕЛАРИИ НА АРМ
Парите имаат голема улога во моделирањето на армијата, а војската, ако е добро финансирана, може да ја моделира самата историја е една од познатите мисли на американскиот легендарен претседател Томас Џеферсон, кој го рекол ова во моментите кога ја формирал својата армија.
Токму поентата на оваа позната реченица на Џеферсон можеби треба да се примени и во Македонија, ако се знае дека годинава Владата одлучи да го забрза процесот што трае веќе петнаесетина години за отуѓување на вишокот имот на АРМ и на Министерството за одбрана.
Со последната одлука на надлежните е решено имотот што е прогласен за несуштински, во кој влегуваат караули, магацини и деловен простор, да биде комплетно отуѓен на цивили до 2020 година.
Добро упатените советуваат дека воените објекти што сега им се донираат на општините и им се продаваат на цивилите, можеби треба да се остават на војската и таа сама да стопанисуваа со она што го поседува, а и на тој начин да се полни дополнително нејзината каса.
Во почетокот на годинава Министерството за одбрана информира дека за начинот на отуѓување на недвижности одлучила Владата во согласност со Законот за користењето и располагањето со имотот на државните органи.
- Средствата што се добиваат од продажба на недвижностите се слеваат во буџетот на Република Македонија, а за нивно реалоцирање кон буџетот на Министерството за одбрана (во висина на отуѓениот имот) исто така одлучува Владата на Република Македонија - информира тогаш Министерството.
Според планот, одбраната се ослободува од 40 караули, 15 деловни простори, 13 магацински групи, два дома на АРМ, три ресторани и две фарми.
Сепак Министерството за одбрана откога почна овој план досега сѐ уште не објави процена на вредноста на имотот што ќе се отуѓува. Според некои неофицијални информации, почетната вредност на несуштинскиот имот на АРМ беше проценета на 53 милиони евра.
Домот на АРМ ќе стане хотел?
Проблемот со продажбата на овој воен имот не е во тоа што армијата ќе остане без земјиште и објекти што реално не ги користи, туку во фактот што продажбата нема да ја збогати македонската војска, а парите, наместо да влезат во армиската каса за набавка на нова опрема и оружје, ќе ги полнат буџетите на општините.
Токму на оваа тема генералскиот врв на АРМ годинава во неодамнешен брифинг за новинарите најави дека планира да најде успешен модус за дополнително финансирање на војската преку системот на паметната одбрана на НАТО. Досега од овој план беше реализиран само еден проект и беше извршено возобновување на бродовите на езерската флота, кои сега се изнајмуваат за комерцијални цели, а рентата се влева во касата на АРМ.
Двата брода, наместо да ’рѓосуваат во Преспанско Езеро и во вештачкото езеро Козјак, сега пловат со туристи по Охридско Езеро.
Како еден од можните проекти, кој за жал сѐ уште не е финализиран, се реконструкцијата, модернизацијата и комерцијализација на Домот на армијата во Скопје. Војската планира домот да го надгради во хотел и од воен објект, кој има атрактивната локација во строгиот центар на Скопје, тој да биде пренаменет и да прерасне во доходовна градба. Според она што се говорело на неколку состаноци на високиот генералски врв на АРМ, било заклучено дека со мали финансиски инвестиции зградата каде што е сместен Домот на армијата може да се пренамени, организира и догради за во иднина да биде комерцијално искористена. Планот за објектот, кој е во почетна фаза, предвидува реновирање на свечената сала и неколкуте хола, како и инвестирање во мензата и во кујната во Домот на АРМ. Целта е потоа со едноставна доградба на два или неколку ката што би се издигнале над сегашното ниво на објектот тој да биде преадаптиран во модерен хотел со кој во иднина ќе стопанисуваат армијата и Министерството за одбрана. Овој објект главно ќе се користи за прием и за престој на високи воени, но и државни функционери што ја посетуваат државата, а истовремено своите капацитети ќе ги користи за привлекување на многубројните туристи што преноќуваат во Скопје.
Наместо касарна, никнува мал град во Кичево
За само две години откога армискиот имот беше преземен од нови сопственици никнува вистински мал град во кичевската касарна „Чеде Филиповска-Даме“.
На некогашниот имот на војската во кичевската касарна е планирано да се изградат околу 500 стана и голем број деловни простори, а во оваа практично нова населба во градот се очекува да се населат приближно 3.000 жители.
- По отстапувањето на дел од касарната во 2011 година на општината на оваа локација почна да функционираат дисперзираните студии на тетовскиот универзитет, а извесно време подоцна почна и изградбата на три станбено-деловни комплекси - вели Дарко Блески, задолжен во општината Кичево за локален економски развој.
Тој објаснува дека сѐ што почнало да се гради на овој поранешен армиски имот ќе биде готово до 2017 година.
Сопственикот на градежната компанија „Инсталација“, која работи на поранешниот армиски имот, Исмаил Исеини, тврди дека становите што се градат тука добро ќе се продаваат на пазарот, а поголем дел од нив однапред биле продадени.
- Пријатно сме изненадени од интересот на граѓаните за купување станови и дуќани во новите објекти. Над 70 отсто од становите што се во градба се веќе продадени по цена од 600 евра за квадрат - објаснува Исеини.
http://www.novamakedonija.com.mk/NewsDetal.asp?vest=12513825525&id=9&prilog=0&setIzdanie=23045
