Војниците на АРМ како американските маринциВкупно 71 склек за две минути треба да направат младите војници до 21 година за да освојат 100 бодови на физичките проверки додека девојките треба да направат 42 склека. За максималните бодови, мажите од најстарата генерација од 57-61 година која е подложна на проверките, треба да направат 53 склекови и 64 стомачни додека за долната граница од 60 бода, мажите треба да направат 18 склека и 26 стомачни, а жените треба да направат осум склека и 26 стомачни како мажите.
Македонските војници и офицери тренираат на ист начин како американските маринци, а силната волја несомнено им е главното оружје со кое ги издржуваат исцрпувачките тренинзи кои за нив поминуваат во услови далеку под американското ниво.
Тестот на издржливост војската треба да го положи во три дисциплини, склекови, стомачни и трчање на 3.2 километри, а нивниот перформанс се оценува според бодовна скала од 50 до 100 бодови.
Незадоволителна оценка се освоени 59 бода, задоволителна е 60-64 бодови, добра оценка се 65-74, додека 75-84 бодови значат дека припадникот се истакнува додека за војникот или офицерот кој освоил од 85-100 бода се вели дека особено се истакнува.
Проверките за физичката подготвеност се спроведуваат два пати годишно, првата редовна проверка е во април, дополнителната во јуни додека втората редовна проверка е во септември и втората дополнителна во ноември.
Тука нема пардон а тестот се смета за положен доколку персоналот во текот на календарската година ги положил двете редовни и дополнителни проверки.
Полковникот и портпарол на АРМ, Мирче Ѓорѓоски, вели дека физичката проверка влече длабоки корени, а за составувањето користени се искуства од повеќе држави од светот пред се од НАТО за да се воспостават врвни стандарди.
- Во најдобар дел, нашата физичка проверка е идентична со американската, поточно со маринците. Таа 15 години е еден од критериумите и од стандардите кој е исклучително важен во кариерата и во развојот за еден припадник на АРМ. Тоа ние сме го вградиле во законот за служба и во одредени правилници со кои тоа се регулира, истакнува Ѓорѓески.
Војската и офицерите треба да бидат физички активни преку целата година за да можат да ги поминат строгите критериуми.
Специјалните единици се подложни на уште построги критериуми и на проверките треба да освојат многу повеќе бодови односно доколку минимумот за офицерите и војниците е 60 бодови, припадниците на баталјонот за специјални намени и ренџерите треба да освојат 80 бодови.
Имено, најмладата група до 21 година во машка конкуренција, за да ги освои максималните 100 бодови треба да направи 71 склек за две минути додека жените не се ни малку поштедени и за 100 бодови, припадничка на АРМ треба да направи 42 склека.
Минимумот за проверките се 60 бодови а за да ги постигнат овие бодови, најмладите машки треба да направат 42 склека а жените 19 склекови.
Тие треба да се истакнат и во делот на стомачните вежби и конкретно, мажите треба за две минути да направат 78 стомачни да освојат 100 бода на оценувањето додека долната граница е 53 стомачни за мажите а 50 за девојките.
За да ги поминат подготовките, и најстарата генерација која е подложна на проверка од 57-61 година треба да покажат значителна физичка спремност.
Имено, за да освојат 100 бода, мажите треба да направат 53 склекови и 64 стомачни додека за долната граница од 60 бода, мажите треба да направат 18 склека и 26 стомачни додека жените треба да направат осум склека и исто 26 стомачни како мажите.
Трите километри трчање, за 100 бода, најмладите мажи треба да ги истрчаат за 13 минути додека жените за 15.36 минути додека мажите до 61 година, за максималните 100 бода, патеката треба да ја истрчаат за 15.18 минути а жените за 19.42 минути.
Минимумот за трчање за постарите е 19.54 минути за мажи а за жените 24.48 минути.
Полковникот Ѓорѓоски вели војникот или офицерот може да биде ослободен од трчање по препорака на лекар-специјалист.
Сепак, мора да ги помине стомачните и склековите а трчањето да го замени со 10км возење велосипед или 4 километри пешачење, рече тој.
Полковникот објаснува дека од оценката се одредува така што се пресметува аритметичката средина од збирот од бодови.
- Физичката оценка е многу важна, но се разбира не и пресудна. На пример, лицето може да биде одличен спортист, но ако не биде комплетен на военостручен план тој пак може да го изгуби статусот. Секако, многу е важно на пример, ако разгледувате двајца старешини за унапредување, ако сите оценки им се исти, а едниот има подобра оценка по физичко, тогаш логично е тој да добие предност. За Генералштабот, и останатите штабови на бригади, полкови, имаме два пати неделно од 12 до 14 часот во вторник и четврток тренинзи. Таму секој има можност да трча, вежба доколку сака може да работи и по програма од стручно лице. Кај единиците пак има задолжителни часови организирано трчање, вежбање, истакнува Ѓорѓески.
Физичката проверка е само една компонента од целосната службена оценка која се добива на годишно ниво. Сепак, критериумите се така строги што, доколку само една компонента е негативна, целосната службена оценка за таа година е негативна. Доколку некој од целокупниот активен воен персонал на АРМ, добие две години по ред негативна оценка заради на само една компонента, на пример, слаб резултат во физичката проверка, тогаш тој ризикува да ја изгуби службата.
- Во оценувањето имате повеќе критериуми а еден од нив е физичката подготвеност. Доколку вие имате по некој критериум негативна оценка вие за таа година имате негативна оценка комплетно. Ако и наредната година имате негативна оценка тогаш ризикувате, по основ на закон да ја изгубите службата, вели Ѓорѓоски.
Од офицерскиот кор, исклучени од физичка проверка се само генералите додека останатиот воен персонал може да бидат исклучен од проверките доколку е упатен на служба во странство, во воени претставништва, мисии и штабови на НАТО и други меѓународни организации и воени единици како и за школување, стручно оспособување и усовршување и специјализација за потребите на службата.
Ѓорѓоски вели дека вака поставената физичка проверка бара од секој припадник на АРМ редовно да ја одржува кондицијата.
- Доколку покажува макар и минимум од овие резултати или постигнува добри просечни или одлични резултати, тоа е многу важно за извршување на задачите. Да не правиме муабет за војникот на бојното поле. Исто така физичките активности несомнено се одличен начин за подобрата здравствена состојба на секој припадник на АРМ. Ако редовно вежбате и спортувате, ќе имате многу помалку здравствени проблеми, смета Ѓорѓоски.
Припадниците на Генералштабот на АРМ, вежбаат на воениот стадион во Градскиот парк додека војниците од касарните, вежбаат на игралиштата во касарните.
Сепак, прашање е колку АРМ и покрај големата желба да има подобри услови за спорт, со нејзиниот буџет може да успее да направи сопствени теретани.
http://www.vecer.mk/?ItemID=B40F904F870CB54AB0EDEBC547144504 
