Сака да направи дечково нешто ама не му оди
АРМ да се модернизира како сојузничките војски од НАТОПрвиот човек на Алијансата, Андерс Фог Расмусен, за британскиот весник „Телеграф“ пишува дека во овие тешки времиња, во текот на кризата во Украина, неопходно е секоја од членките на НАТО да инвестира во ресурси и во модерно екипирање на својата војска
ИНВЕСТИРАЊЕ ВО ОДБРАНАТА
Кризата во Украина покажа дека одбраната на својата земја, а со тоа и одбраната на демократијата во светот, е поважна сега од кога било, па токму затоа секоја членка на НАТО треба сериозно да работи на полето на модернизацијата на својата армија. Ова е извадок од авторскиот текст на генералниот секретар на НАТО, Андерс Фог Расмусен, објавен изминатава недела во британскиот дневен весник „Телеграф“.
Во текстот Расмусен инсистира дека членките на НАТО сакале или не мораат да инвестираат во одбраната и во нејзиното опремување.
Првиот човек на Алијансата пишува дека во овие тешки времиња, во текот на кризата во Украина, неопходно е секоја од членките на НАТО да инвестира во ресурси и во модерно екипирање на својата војска.
- Знаеме колку ова наше барање е голем предизвик во сегашната економска клима, но климата во сферата на безбедноста е од животна важност - се вели во текстот.
Долгорочно, отсуството безбедност ќе чини поскапо, отколку што инвестициите би ги чинеле државите сега, предупредува тој во својот напис во „Телеграф“.
Неопходна модернизација на АРМ
Токму овие најнови препораки на Расмусен, кој изминатата недела беше гостин во Македонија, а се дадени кон членки на НАТО, можеби би требало Македонија да ги разгледа многу сериозно.
Експертската јавност во земјава честопати посочуваше дека на АРМ во моментов очајно ѝ треба набавка на нова и модерна опрема и оружје.
Македонија треба да купи транспортен авион за трупите што одат на мисии во странство, хеликоптери за транспорт и за специјалните единици, нови џипови за командосите и да обезбеди дигитална опрема за пешадијата за проектот „Војник на 21 век“.
Шаренило на потеклото на вооружувањето
Наследството од ЈНА, набавките и донациите на оружје и на опрема во АРМ направија своевиден спој на Истокот и Западот и уникатно шаренило во вооружувањето на нашата војска.
Во овие моменти во АРМ се користат руски тенкови, украински авиони и хеликоптери, германски оклопни возила, британски, американски и австриски џипови и холандски камиони и италијански комбиња. Освен орудијата, македонскиот војник на себе носи најчесто југословенска пушка, американски чизми и македонски шлем и униформа.
На честите воени вежби на домашниот воени полигон „Криволак“, кои се одржуваат за да се оцени борбената готовност на нашата војска додека чекаме да влеземе во НАТО, лесно може да се забележи дека пешадијата, воздухопловите и оклопните возила во овие „воени игри“ се поддржувани од американска и од југословенска артилерија и борбени ракети.
Со какво оружје располага АРМИсклучувањето на Република Македонија од ембаргото за увоз и извоз на оружје на Обединетите нации во 1996 година ја наметна потребата од опремување на АРМ со современо вооружување и воена техника. Во услови на ограничени финансиски можности, Република Македонија во периодот помеѓу 1992 и 2000 година набави одредени количества оружје и воена опрема. Во тој период АРМ проблемот со недостиг на скапо современо оружје и воена опрема го решаваше низ донации и поволни аранжмани од земјите-членки на НАТО и други пријателски држави. Немирите што ја зафатија Република Македонија пред 13 години ја принудија нашата земја, и покрај лошата економска состојба, да пристапи кон набавка на сето оружје и воена опрема што недостигаа.
Пешадија
Во моментов стандардно пешадиско вооружување на АРМ се југословенските верзии на автоматската пушка „калашников“ - од пушката „М70АБ2“ до лесниот митралез „М-84“. Стандардни во единиците на АРМ се и снајперската пушка „М-76“ и автоматскиот пиштол „М-61 скорпион“, а од југословенско производство се и орудијата за поддршка - минофрлачите и противтенковските орудија. Традицијата продолжува и со српската снајперска пушка „М-93 црна стрела“, произведена во истата фабрика, како и другото пешадиско оружје на АРМ.
Одредени единици на АРМ се вооружени и со американски јуришни карабини „М-4“, покуса верзија на пушката „М-16“, а на располагање имаат и германски автоматски пушки „Г-3“ и „Г-33“, автомати „хеклер и кох“, „МП-5“ и митралези „МГ-3“ и британски, германски и фински снајперски пушки. Од западно производство се комуникациските системи, беспилотните летала и најголемиот дел од електронските системи на АРМ.
Оклопни единици
Копнената војска на АРМ денес поседува повеќе од 300 борбени возила: повеќе од 20 тенка „Т-55“ и „Т-72“, 11 борбени возила на пешадијата „БМП-2“, повеќе од 200 оклопни транспортери „ТМ-170 хермелин“, „БТР-70“, „БТР-80“, „М-113“ и „леонидас“.
АРМ располага и со 126 камиони од „ДАФ“ и околу 150 американски камиони „М-35“.
Армиската македонска артилерија може да се пофали со фактот дека поседува повеќецевни ракетно-лансирни системи „БМ-21 град“ (122 мм) и „М-63 пламен“ (128 мм), 108 хаубици „Д-30“ (122 мм), 36 хаубици „М101А1“ (105 мм), ридски топови „Б-1“ (76 мм), бесповлечни топови „М-60“ (82 мм) и минофрлачи со калибар 60 мм, 82 мм и 120 мм.
Воздухопловство
Военото воздухопловство и противвоздушната одбрана на АРМ поседуваат четири борбени авиони „су-25“ (од Украина), 6 школски авиони злин-242Л, 12 борбени хеликоптери „ми-24В/К“, 4 борбено-транспортни хеликоптери „ми-8МТ“, 3 транспортни хеликоптери „ми-17“ и два повеќенаменски хеликоптери „УХ-1Х хјуи“.
Единиците за противвоздушна одбрана се опремени со мобилни системи за противвоздушна одбрана стрела-10М, преносни системи за противвоздушна одбрана игла-1 и стрела-2М, како и со противавионски топови со калибар од 20 мм и 40 мм.
http://www.novamakedonija.com.mk/NewsDetal.asp?vest=5261466372&id=9&setIzdanie=23183&fb_action_ids=873960142618032&fb_action_types=og.likes&fb_ref=.U4ZbkqARQsw.like
