Членството во НАТО останува главна цел на Македонија
Интеграцијата на нашата земја во НАТО е заедничка обврска и главна политичка определба, интенција, цел и заслуга на сите политички партии, општествени чинители и граѓани, вели министерот за одбрана Талат Џафери.
Постои голема можност ако Македонија ги обедини сите политички сили да се инсистира земјата да биде поканета за членство во НАТО на идниот самит
ОДБЕЛЕЖАН ЈУБИЛЕЈОТ НА АЛИЈАНСАТА
Стратегиска определба на Македонија останува зачленувањето во НАТО. Ова е главната порака што ја упатија високи државни функционери и политичари од власта и од опозицијата на вчерашното одбележување на 4 април, Денот на НАТО во земјава.
- Денот што го одбележува Алијансата е ден што ја промени визијата за мирот, безбедноста и стабилноста и потврди дека е остварена основната замисла од вашингтонскиот договор - истакна вчера министерот за одбрана Талат Џафери на свечената манифестација за одбележување на јубилејот во Домот на АРМ.
Безбедност, стабилност и економски пораст
Тој подвлече дека Алијансата беше, е и останува главен двигател на споделувањето на заедничките вредности на демократијата, на слободата, на правдата, на човековите права и слободи и на многу други општоцивилизациски вредности.
Според него, во септември, на самитот на НАТО во Обединетото Кралство, земјите-членки ќе најадат начин високо на својата агенда да го стават и прашањето за проширување со нови земји-членки.
- На членството во НАТО се гледа како на суштински предуслов за зголемување на безбедноста и на стабилноста, кое позитивно ќе влијае и врз деловната клима, економскиот пораст, развојот и благосостојбата на нашите граѓани - истакна Џафери.
Интеграцијата на нашата земја во НАТО за Џафери е заедничка обврска и главна политичка определба, интенција, цел и заслуга на сите политички партии, општествени чинители и граѓани.
Тој порача дека Македонија останува посветена на понатамошниот придонес и во новата мисија „Резолут сапорт“ по 2014 година, во рамките на заедничкиот СОФА-договор со НАТО и партнерите.
- Армијата располага со експерти за обука и советување во областа на воената полиција, врските, разузнавањето и други области, во согласност со потребата на Авганистан и нашите национални капацитети и способности - додаде Џафери.
Според шефот на Канцеларијата на НАТО во Македонија, полковник Александар Александров, НАТО не е само сојуз на држави со споделени вредносни системи засновани врз консензуални одлуки.
- НАТО е сојуз на целосно независни држави што постојат и носат одлуки како такви, а не во услови на лимитиран суверенитет - посочи Александров.
Потпретседателот на Евроатлантскиот совет на Македонија, Исмет Рамадани, во своето обраќање говореше за активностите во Алијансата, која во 2013 година успешно извршуваше задачи во Авганистан, за поддршката во Косово, како и за зголемената и продлабочена работа насекаде низ светот.
На следниот самит да влеземе во НАТО
На оваа тема првиот човек на Коалицијата за позитивна Македонија, Владо Бучковски, истакна дека НАТО беше и треба да остане и натаму единствената алтернатива за Македонија.
- Сето она што се случува последните неколку месеци во Украина треба да биде дополнително предупредување до нашите партнери од Алијансата дека не треба Македонија да ја остават сега кога НАТО ѝ е најпотребен - подвлече Бучковски.
Тој објасни дека во Коалицијата за позитивна Македонија сметаат дека постои голема можност ако Македонија ги обедини сите политички сили да се инсистира земјата да биде поканета за членство во НАТО на идниот самит, кој ќе се одржи есента во Британија.
- На тој начин ќе се испрати сериозна порака до сите граѓани на Македонија дека политичарите го респектираат преовладувачкото јавно мислење на оваа тема, кое достигнува фантастични 90 проценти поддршка - подвлече Бучковски.
Поранешниот министер за одбрана напомена дека Македонија овој чин одамна го заслужи.
- Ако во 2008-та за членство бевме попречени од грчкото вето, сега по добивањето на хашката пресуда е вистински момент Република Македонија да биде поканета под привремената референца и да почне постапката за членување во НАТО - објасни Бучковски.
Тој објасни дека постапката за овој чин трае во Алијансата меѓу 12 и 18 месеци, а сите држави-членки на НАТО треба спогодбата да ја ратификуваат во своите парламенти.
- Ние предлагаме како решение последна држава што треба да го ратификува нашето членство во НАТО да биде соседна Грција. Токму овој период од 12 до 18 месеци е сосема разумен период во кој двете земји би можеле да најдат заедничко прифатливо решение за разликите за нашето уставно име - резимира Бучковски.
АРМ рамо до рамо вежба со НАТО
Две големи воени вежби под префикс на НАТО, од која едната во Македонија, а втората во Белгија и во Луксембург, се вметнати на листата на активности на македонската војска за наредните месеци.
Во центарот за обука „Пепелиште“, на полигонот Криволак, од 7 до 12 април ќе се одржи воената вежба „Македонски блесок-10“ (МБ-10), на која ќе има завршно оценување на припадниците на АРМ за добивање сертификат за учество на одредени меѓународни операции предводени од НАТО, ЕУ или од ОН.
Вежбата ќе се реализира со приближно 1.400 војници, а таа ќе има четири фази според сценариото базирано на мировните операции на ОН предводени од НАТО.
Од друга страна, во мај и во јуни, сто и педесет војници на АРМ ќе бидат оценувани како дел од борбена група на Европската Унија и на НАТО на воена вежба во Белгија и во Луксембург. Во вежбата „Брз лав 14“ ќе учествуваат 2.900 војници од Белгија, Германија, Луксембург, Македонија, Холандија и од Шпанија.
