И како анализа на манџава деновиве, убава колумна.
Портпаролот на ДУИ, Бујар Османи, смета дека Бесими не е многу потресен, а непоздравувањето не било предмет на меѓупартиска расправа
Наум Котевски
Наместо Армијата на Македонија да биде во центарот на вниманието, како што доликува на јубилејот 20 години од нејзиното формирање, премиерот Никола Груевски одлучи да украде уште некоја минута слава и тој да биде ѕвезда на свечената парада во касарната „Илинден“. Премиерот Груевски не сакаше да го види својот министер Фатмир Бесими, а камоли да се поздрави со него, оставајќи го така главниот во ресорот за одбрана да дреме на три метри од него. Тоа беше одмаздата на премиерот за одлуката на Бесими да положи цвеќе, заедно со уште четворица лица во униформи на АРМ, на споменикот на загинатите борци на ОНА во Слупчане.
„Не мислам дека Бесими е многу потресен“, ни изјави вчера портпаролот на ДУИ, Бујар Османи, додавајќи дека непоздравувањето не е нешто што може да биде предмет на меѓупартиска расправа.
Како и да е, тешко е да се поверува дека Груевски е толку гневен и бесен, поради, како што го нарече Владата, самоволието на приватното лице Бесими. Ако е така, зошто тогаш Груевски би седел во владата со командантите, претпоставените, налогодавците на загинатите бунтовници од 2001 година.
Очигледно е дека станува збор за газење строев чекор по неговата суета, која е нагризана, како што беше нагризан асфалтот во „Илинден“ од притисокот на тенковите на АРМ. Но, тоа е болката во оваа земја полна со иронии. И тенковите и цвеќињата може да направат голема беља.
Ако гардата е лицето на војската, тогаш Груевски и Бесими според функциите треба да го претставуваат лицето на државата во целост. Но, тие државнички се погрижија да паднат војничките камелеонски бои, овозможувајќи и' на јавноста уште еднаш јасно да се увери дека практично станува збор за две лица на едно тело, кои неискрено и декларативно ги доближуваат образите на толеранцијата и соживотот, а многу поискрено оние на предрасудите и стереотипите.
Сега пред да почнат новите јавни седници на Владата, каде што Бесими сигурно ќе добива најтешки прашања од Груевски, се поставува прашањето според кое сценарио ќе се одвиваат работите во владејачката коалиција ако е сосема јасно дека премиерот со тоа што не му ја подаде раката на Бесими, кажа дека не сака да се поздрави ниту со Али Ахмети, ниту, пак, со комплетната ДУИ, без која не може да егзистира во власта. Освен ако Груевски не смета дека Бесими е најсилното вработено лице кај „интегративците“.
Размислувањата одат од крајност во крајност. Едни велат дека ова е уште една добро изрежирана претстава од главните актери на политичката сцена и дека секој ќе си собере по некој глас кај националистичко запалениот дел од гласачкото тело. Други, пак, сметаат дека ВМРО-ДПМНЕ одлучила свесно да ја заострува ситуацијата, како засилување на сопствените аргументи за предвремени парламентарни избори, кои би се одржале заедно со локалните. Многу веројатна изгледа и можноста работите да се средат како ништо да не било, како што, впрочем, многу пати досега се случуваше (така беше и по тепачките на Скопското кале).
Но, што доколку работите навистина им избегале од контрола, тогаш Груевски ќе мора она што го закопа јавно, да го оживува тајно, условен од политичкиот амбиент и соработката меѓу Мендух Тачи и Бранко Црвенковски. Во спротивно, иако неговата партија не покажа достојна почит кон Киро Глигоров, Груевски ќе биде доведен во ситуација, по најголемото недоразбирање меѓу двете партии, да ја изговори токму култната реченица на првиот претседател: „Не оставајте ме сам“.
Професорот Јове Кекеновски е на линија дека станува збор за евтина глума.
„Колку што јас се разбирам во театар, првиот чин на оваа евтина драмолетка има повеќе комичен заплет и расплет, вториот е некако релаксиран и е вовед за бурните случувања во третиот чин каде што преземените дејства можат да станат и трагикомични. Првиот чин почна со поклонувањето пред споменикот на загинатите припадници на ОНА во Слупчане и заврши со парадата во касарната ’Илинден‘. И не само парада на вооружените сили на АРМ, туку парада и на главните актери, каде што го видовме нивното вистинско лице. Евтина драмолетка, евтини актери кои слабо ја одиграа улогата која случајно (или намерно) им беше доделена. Трагикомичното е што сите актери сакаат да останат чисти и сите да бидат патриоти. Секој пред своите гледачи, секој пред својата публика“, потенцира Кекеновски.
Професорката Билјана Ванковска вели дека откако ќе се тргне настрана првичниот шок и неверување од настаните поврзани со Слупчане и одбележувањето на 20-годишниот јубилеј на АРМ, рационално гледано не се случува ништо што веќе не сме го доживеале.
„’Функционалната‘ владејачка коалиција меѓу ВМРО-ДПМНЕ и ДУИ наликува на врска на истовремена љубов и омраза, а некако одговара на општество кое страда од ’поделена личност‘. Најновиве случувања се дежа ву на настаните на Кале: подгревање на емоциите заради политичко-партиски цели. Тоа што Груевски не го поздравил Бесими е безначајна дребулија и пикантерија од политичкиот живот, во споредба со фактите кои говорат за прекршување на законите и принципот на владеење на правото од носители на највисоки државни функции“, посочува Ванковска.
Според неа, без оглед како ова ќе го оквалификуваат претседателот на Републиката или на Владата, јасно е дека министерот е недопирлив во смисла на политичка или правна одговорност. „Не е ништо ново, но мораме да нагласиме уште еднаш дека консоцијацијата (рамковната демократија) ја претвори Македонија во бинационална држава, дека имаме две влади и два премиера во една иста влада. Ново е што сега имаме јасна поделеност во армиските редови, па зборуваме за ’униформирани лица од кабинетот на министерот‘, небаре се тие дел на негова преторијанска гарда, а не дел од единствената воена организација“.
Според Кекеновски, со Законот за посебни права на бранителите, кој ВМРО- ДПМНЕ го достави во Собранието, допрва ќе го видиме сиот сјај и беда на главните и споредните актери на, како што нагласува, оваа евтина драмолетка.
„Ќе ја видиме евтината глума и, конечно, самите ќе се убедиме дека прескапо сме ја платиле картата за да го гледаме оваа глумење. На крајот сите ќе се увериме дека предложениот закон воопшто нема да помине или, пак, доколку помине за брзо време ќе мора да помине и законот за правата на припадниците на ОНА. Исто онака како што помина и автентичното толкување на Законот за амнестија. Што би рекле постарите, и волкот сит и овците на број. Јас би додал: Ептен на број, зошто ова се мирни, кротки овци“.
На главното прашање, како ќе се резвиваат односите меѓу партнерите во коалицијата, новинарот Назим Рашиди вели дека тензии ќе има, но тие во овој момент се далеку од драматични. Односите во владејачката коалиција ќе зависат од тоа каква ќе биде расправата во Собранието околу предложениот Закон за бранителите.
„На ’Фејсбук’ меѓу Албанците се води голема дебата за тоа како треба да се однесува ДУИ спрема ВМРО-ДПМНЕ. Тргнувајќи од тоа, за очекување е дека ’интегративците‘ ќе извршат притисок врз најбројната македонска партија во парламентот да го повлече законот од процедура. Според мене, ДУИ сака да остави впечаток дека не е за се' во коалиција со ВМРО-ДПМНЕ, а од друга страна треба да ја изменаџира целата ситуација кај албанската јавност затоа што таму Груевски е најнепопуларен политичар поради неговиот ригиден национален став“, вели Рашиди. Тој е убеден дека Фатмир Бесими добил огромни симпатии кај албанската јавност бидејќи САД го поддржаа неговиот чекор.
„Главниот заклучок е дека политичката класа не е дорасната на настаните и развојот на ситуацијата. Затоа очекувам дека тензиите меѓу коалициските партии ќе растат. Во моментов е невозможно да се зборува дека тоа може да доведе до распад на коалицијата. Може само да се каже дека нивните односи по сите случувања нема да бидат исти“, додава Рашиди.
СДСМ го поддржува Законот за бранителите
Законот за посебните права на бранителите, кој треба утре да се најде пред пратениците, според наши информации, ВМРО-ДПМНЕ го подготвувал од порано и, наводно, требало да биде искористен како предизборно оружје. Сепак, новонастаната ситуација со случајот Слупчане го забрзала поднесувањето. За Законот за бранителите пратениците на ВМРО-ДПМНЕ во 2008 година гласаа против. Образложение на премиерот тогаш беше дека Законот ќе претставува огромен финансиски товар.
Од СДСМ вчера ни потврдија дека нема да го менуваат својот став и дека ќе гласаат за секој закон кој ќе го подобри статусот на припадниците на безбедносните сили. „Жалиме што поради инаетот и политичките калкулации на ВМРО-ДПМНЕ, се изгубија четири години, во кои припадниците на безбедносните сили можеа да ги уживаат правата кои им припаѓаат“, велат од СДСМ.
Најголемата опозициска партија ја потсетува јавноста дека уште во 2008 година го поддржала законот изготвен од самите бранители и „Достоинство“, кој беше потпишан од повеќе од 30.000 граѓани.
„Груевски и ВМРО ДПМНЕ тогаш заради мир во коалицијата со ДУИ не го поддржаа законот и до сега без исклучок ги одбиваа сите предлози кои требаше да го подобрат статусот на бранителите. Ако во 2008 година, ВМРО- ДПМНЕ го одби законот единствено мотивиран од дневните пазари со ДУИ, и денес се случува истото, предлага закон само за да ја покрие штетата од актуелната кавга со својот коалициски партнер. Очигледно е дека и тогаш и сега на ВМРО-ДПМНЕ воопшто не му се важни правата на бранителите, туку дневните политички пазари во владината коалиција“, потенцираат од СДСМ.
http://www.utrinski.com.mk/default.asp?ItemID=4494BF09FC5C534BAD88C72867B27A2D
), и со тоа што ќе се изгласа Законот за бранителите, и со тоа тој му ја негира сржта на постоењето на партијата Достоинство - мошне мудро!
