Не прашуваме колку се, туку каде се!
Кога завесата од чадните бомби ќе се крене, од зад чадот се провираат скриени лица, остри погледи и заковани раце на оружјето. Стегнати во униформи и со зграпчено оружје чиј кундак е припиен до брада и рамо, на првата команда се постројуваат за нова задача. Кога ќе затреба тие се и во град и во село, и во вода и во снег, и во оган и во чад. Тие се сегде. Тоа се полициските тигри. Една од нивните пароли е:
Ние не прашуваме колку се, туку каде се!Единицата за специјални задачи, која е во состав на македонското Министерство за внатрешни работи, има долга историја уште од 1980 година. Тогашниот Републички секретаријат за внатрешни работи на СРМ на ден пред Нова година донел одлука за формирање Одделение за специјални задачи при секторот за посебни единици на тогашната милиција, а од први јануари 1981 година единицата почнува да работи. По неколку месеци Одделението прераснува во Станица на милиција за извршување на специјални задачи и како таква работи се до 1991 година кога се преименува во Полициска станица на ЕСЗ. Како Единица за специјални задачи датира од седми мај 1992 година. Во 1999 година го земаат тигарот како свој заштитен знак и го ставаат ликот на тигарот како свој симбол на униформите.
Кога не се на задача и во акција, тигрите се на полигоните, во салите за вежбање, на гаѓање, на планина...вежбаат. Минатата недела ги затекнавме на Маврово. Тоа беше дел од нивната секојдневна работа, овојпат во зимски услови. Поминавме еден ден со нив за да ги видиме нивните вештини во ракувањето со лесно вооружување, нивната прецизност во гаѓањето, скијањето, ориентацијата во просторот, упадот во куќи, пробивање низ длабок снег, укажување помош и извлекување ранети...
Кога стигнавме на Маврово специјалците веќе беа на позициите. И кога имаат најрутински тренинзи нивниот ден почнува рано. Дел од тигрите затекнавме на еден рид. Еднообразно облечени во скијачка опрема, со пушките на рамо, построени ги примаа наредбите од претпоставениот офицер. Не им требаше многу време да ја добијат задачата, да ги исчитаат мапите, бидејќи на места целосно покриени со снег и без никакви траги тоа е неопходно, и набрзина се спуштија по мавровските падини, секој според командата што ја добил. Додека скијачите ги сечат падините, покрај нив прелетуваат нивните колеги со зимските санки залетани како да влегуваат во најголемата задача што до тогаш ја добиле.
На другата страна еден вод веќе ги решеташе метите. Вежбаа гаѓање со автоматска пушка и со пиштол. Снегот околу нив беше послан со чаури од испуканите куршуми, а на дупчињата на метите покажуваа дека ниеден погодок не завршил надвор од целта. Молскавично се празнат шаржерите, па се полнат нови. Се усвитуваат цевките на пиштолите стегнати во рацете на тигарот како во менгеме.
Една од задачите на ЕСЗ е и укажување помош во високопланински услови. Тимот специјалци вежбаше и таква активност која опфаќа обезбедување на местото каде треба да му се укаже помош на повредениот, укажување помош и негов транспорт со моторните санки на специјалците.
Специјалност на тигрите е решавање на високоризични ситуации со забарикадирани опасни лица. Имавме среќа да присуствуваме и на еден таков упад во куќа под претпоставка дека внатре се наоѓаат група терористи. Водот полека се распоредува. Секој си ја знае позицијата. Се се држи на нишан, пиле не смее да прелета. Се е тивко. Полека се освојува секоја педа. И одеднаш акција. Молскавичен упад. Терористите се совладани додека да трепнат, заложниците ослободени. Акцијата успешно завршена. Се беше само секојдневна вежба, а адреналинот кренат како да е се вистински.
За тоа време друга група е далеку од нас. Во пошумениот дел на Маврово. Отидовме и кај нив. Чиниш нема ништо во шумата. Напрегаш поглед за во гранките, под маската, да здогледаш очи на специјалец. Маскирните униформи се претопиле во средината. Не се слуша ни збор, ни шум. Почнуваат сигналите со раце. Формација, дијамант, ромб, змија... Повторно акција, рафал, истрелите ја дерат планината. Непријателот е совладан. Повторно знаци со рацете. Специјалците се распоредуваат. Се вклучува радиоврската: "Команданте, задачата е извршена... Прием".
Емил Златков
Фото: В. Тануровски
***
Што прават тигрите
ЕСЗ Тигар е организирана како посебна единица во Бирото за јавна безбедност со намена за: планирање и извршување најсложени задачи во борба против тероризмот; решавање заложнички ситуации и ситуации со забарикадирани опасни лица; апсење криминалци и криминални групи; решавање ситуации во случај на пружање отпор со огнено оружје; обезбедување загрозени ВИП личности и објекти; давање асистенција во борбата против организираниот криминал; спасувачки мисии во високопланински и други недостапни терени и обука и едукација на кадри.
http://star.vest.com.mk/default.asp?id=147482&idg=8&idb=2300&rubrika=Revija 
