„Македонска пошта“ го слави раѓањето на балисти и воени злосторници„Македонска пошта" неодамна ја збогати својата колекција на поштенски марки со две скандалозни решенија – поштенска марка со ликот на Реџеп Митровица, премиер на првата квинслишка влада на Албанија од 1943 до 1944 година и претседател на озлогласената Втора призренска лига со која се слави 125-годишнината од неговото раѓање и на Али Риза, соработник, како што тврдат македонски историчари, со фашистичкиот окупатор.
Овие поштенски марки речиси два месеца стојат во колекцијата на „Македонскa поштa“ и никој ниту во јавното претпријатие, ниту во Министерството за транспорт и врски, под чија надлежност е „Македонска пошта“, не помислил да преземе никакви мерки – да ги отстрани спорните марки со кои се слават озлогласени воени злосторници и соработници со фашистите и да побара одговорност од сите инволвирани во овој срамен и скандалозен случај.
Историчарот Ѓорѓи Малковски, автор на делото „Балисти“, како и академикот Блаже Ристевски, беа запрепастени кога слушнаа со кои ликови и какви јубилеи се прославуваат со македонските поштенски марки. Во „Македонска пошта“, пак, ни тврдат дека поштенските марки се предложени по регуларен пат од Страна на Советот за филателија, во кој членувале стручњаци од повеќе области и одобрени од Министерството за транспорт и врски. На нашето прашање знаат ли членовите на Советот кој е Реџеп Митровица и што велат историските факти за неговите злодела и соработка со фашистите од Втората светска војна, во Советот ни одговорија со прашање – а кој тврди дека е соработник со окупаторот??? Стручњаците што предложиле со поштенска марка да се слави 125-годишнината од неговото раѓање сигурно знаеле за кого станува збор, нè уверуваат во „Македонска пошта“.
Историчарите велат дека непобитен историски факт е дека Реџеп Митровица бил претседател на квинслишката влада на Албанија и дека ја предводел Втората призренска лига. Според историските факти, во септември во 1943 година во Призрен бил формиран Иницијативен одбор за свикување основачко собрание на Втората призренска лига, на чело со Џафер Дева и бил одржан подготвителен состанок. Основачкото собрание почнало на 16 септември 1943 година во Призрен во присуство на делагати од шест префектури: четири од Косово (од Призрен, од Пеќ, од Приштина и од Косовска Митровица), една од западна Македонија (од Дебар) и една од Санџак (од Сјеница). Собранието ја завршило работата на 19 септември 1943 година, кога бил избран Централен комитет како највисок раководен орган на Втората албанска лига во состав: Реџеп Митровица, претседател на Централниот комитет, а членови: Тахир Зајми, Ќазим Блаца, Шеху Хасан, Кољ Марчини, Аслан Бољетини, Муса Шеху и други. Втората призренска лига донела Прокламација за обединување на териториите Косово, западна Македонија, јужна Црна Гора, северозападна Грција со Албанија, како и Статут со кој се предвидувало формирање разграноци во окрузите, околиите и општините, а и формирање Комитет за одбрана на Косово. Пролетта 1944 година била формирана СС-дивизијата „Скендер“. Подоцна организацијата „Бали Комбтар“ во целост ја прифатила програмата на Втората албанска призренска лига.
Но во случајов нејасно е зошто го премолчиле овој историски факт стручњаците во Советот за филателија кога го предложиле Митровица како мотив на македонската поштенска марка?
За да биде приказната уште поскандалозна, дознаваме дека во Советот за филателија нема историчар? Имало музичари, уметници... Одамна било кога за потребите на Советот при изборот на мотивите за македонските поштенски марки бил консултиран академикот Блаже Ристовски, и тоа за мотиви на поштенската марка со ликот на истакнати македонски дејци.
Мирната совест по ваквите срамни постапки членовите во Советот за филателија си ја обезбедиле со тоа што нивните предлози биле прифатени и во Министерството за транспорт и врски. И таму очигледно нема историчар да ѝ ги отвори очите на надлежната комисија кога крева два прста за да одобри славење на родендени на балисти и фашисти. Откако МКД.МК побара одговор кој е тој што ги одобрил двете поштенски марки и кој ќе одговара за скандалов, во Министерството за транспорт и врски ни ветија дека ќе го истражат целиот случај и како течела целата постапка во „Македонска пошта“ и дека ќе нè информираат во текот на денов.
http://www.mkd.mk/makedonija/politika/makedonska-poshta-go-slavi-ragjanjeto-na-balisti-i-voeni-zlostorniciТака ни е кога командант бреза е директор на "Македонски Пошти"
