АДВОКАТОТ ПАНЧЕВСКИ ТВРДИ ДЕКА ГЛЕДАЛ ВИДЕОСНИМКА ДЕКА СО РАКЕТА Е СРУШЕН МАКЕДОНСКИОТ ВЛАДИН АВИОН ВО БОСНА:
На два странски јазици си честитаа откако го срушија "кингерот" на Трајковски
Причина за да се изведе атентат врз Трајковски, Панчевски наведува дека е тоа што претседателот поседувал документи кои би го нарушиле угледот на некои западни дипломати кои во 1999 година престојуваа во Македонија. Исто така и аудиозаписите од црната кутија на "кингерот" биле дополнително обработувани и бришени. Сепак, тој тврди дека има аудиозапис на кој јасно се слушаат хаосот кој настанал во кабината и честитките по падот кои биле кажани на два странски јазици
Скопскиот адвокат Игнат Панчевски тврди дека постои видеозапис што лично го видел, а на кој јасно се гледа дека државниот "кингер" бил срушен со ракета и оти претседателот Борис Траковски е жртва на атентат. Кратко време по падот на авионот на местото се појавиле војници на СФОР кои ги уништувале доказите и ги палеле остатоците од авионот, но и од патниците во него.
- Со години упорно тврдам дека е атентат. Сега во Македонија се клучните докази, а тоа е видеозапис. На записот може да се види како воен авион испалува ракета кон државниот "кингер" и го подготвува во крилото. Авионот делумно се распаѓа во воздух и паѓа. Набрзо на местото пристигаат воени возила и хеликоптер кои ги уништуваат доказите, вели адвокатот Панчевски.
Тој додаде дека според доказите кои ги поседува се упатува на добро организирана акција за ликвидација на македонскиот претседател. Врските со авионот намерно биле прекинати за тој да биде наведен кон воздушниот простор каде што го чекал воениот авион за да го сруши.
- Прикриен фактот е дека контактот со "кингерот" е прекинат на трите фреквенции, а во комуникацијата со пилотите се вклучува возено возило кое ги наведува кон воениот авион кој ги чека. Тој ги довел пилотите во заблуда. Тие беа искусни луѓе кои, за жал, се водат како главни виновници. СФОР веќе имал распоредено воени тимови во околината на местото на падот, додава тој.
Причина за да се изведе атентат врз Трајковски, Панчевски наведува дека е тоа што претседателот поседувал документи кои би го нарушиле угледот на некои западни дипломати кои во 1999 година престојуваа во Македонија.
- Тој беше директно инволвиран во сите настани во таа година, бидејќи беше заменик-министер за надворешни работи. Јас долго време работам на случајот и наидов на информации што упатуваат на коруптивни скандали што во тоа време биле извршени од некои високи светски државници. Трајковски поседувал документи како доказ за корупцијата, но не знам што конкретно барал од тие државници. Затоа тој не полета вечерта, како што беше планирано, туку рано наутро наредниот ден, изјави адвокатот Панчевски.
Како доказ на своите тврдења тој приложи рачен часовник и златен синџир на еден од загинатите чие семејство го ангажирало, а хемиската анализа покажала дека тие биле запалени и изгорени од хемикалија, а не керозин, како што требало да биде. Часовникот бил застанат на време кое не кореспондира со официјалната верзија на времето на паѓањето на авионот.
Исто така, и аудиозаписите од црната кутија на "кингерот" биле дополнително обработувани и бришени. Сепак, тој тврди дека има аудиозапис на кој јасно се слушаат хаосот што настанал во кабината и честитките по падот кои биле кажани на два странски јазици.
Според Панчевски истите тие кои стојат зад атентатот на Трајковски, преку свои луѓе во Македонија ја саботираат истрагата сакајќи да се заташка и заборави целиот случај.
- Комисијата која го истражуваше случајот намерно беше одбрана во тој состав за да се изврши наредбата од странскиот фактор, исто како и во Босна и Херцеговина. Таа е некомпетентна и селективно ги обработуваше податоците. Тие не покажаа интерес за доказите кои ги поседувам исто како и Јавното обвинителство, рече Панчевски.
Тој изјави дека сега засега нема да ги даде во јавноста аудио и видеозаписите за да не изгубат во тежина и додаде дека го чекал одговорот на босанските власти на најновиот владин извештај за смртта на Трајковски.
Во првичниот владин извештај за несреќата за главни виновници беа посочен двајцата пилоти, Марко Марковски и Бранко Ивановски, кои летале многу ниско и не се придржувале кон упатствата на контролата за летање од Мостар. Двајцата пилоти, инаку, имаат илјадници часови лет и стотина пати слетале на аеродромот во Мостар, кој меѓу пилотите важи за тежок поради комплицираниот пристап.
Во меѓувреме Владата на РМ повторно ангажира тим истражители кои го обработија целиот случај, а според официјалните информации нивниот извештај бил различен и новите детали упатувале на клучни прашања кои дополнително треба да се одговорат. Сепак, од Владата никогаш не прецизираа за какви детали станува збор. Тоа минатиот месец го потврди и министерката за внатрешни работи, Гордана Јанкулоска.
- Лично сметам дека тој извештај, со оглед на тоа што веќе имаме извештај кој е различен во однос на се друго што претходно било разгледано, заслужува должно внимание и од нашите власти и од босанските, рече тогаш Јанкулоска и додаде дека во оваа фаза не би можела да каже дали тој извештај ќе значи одговор на сите отворени прашања.
Многу домашни и странски експерти веднаш ги оспорија официјалните заклучоци од истрагата и оставија простор за сомневање дека уривањето на авионот можеби не било несреќен случај.
Како неразјаснети останаа прашања и факти како наоѓањето на остатоците од авионот 24 часа по падот, зошто не беа испрашани француските војници од СФОР кои се наоѓаа во контролната кула за летање на мостарскиот аеродром, а оспорена беше и реконструкцијата врз која се темелеше првичниот извештај.
Меѓу првите кои тврдеа дека се работи за атентат беше и европратеникот Андреас Грос, кој во Советот на Европа изјави дека има основани сомневања дека претседателот Трајковски бил цел на атентат и во неколку наврати јавно побара нова истрага за падот на кингерот".
Претседателскиот авион падна во близината на селото Ротимље на 26 февруари 2004 година. Во несреќата, покрај Трајковски, загинаа и Димка Илкова - Бошковиќ, Ристо Блажевски, Анита Кришан - Лозановска, Миле Крстевски, Борис Велинов, Аце Божиновски, Марко Марковски и Бранко Ивановски.
Авионот требаше да слета на мостарскиот аеродром во осум часот по локално време.
(О.Ч.)
http://www.vecer.com.mk/?ItemID=CC9394BC25454644975493EE9445B772
