Почесниот граѓанин Рамуш Харадинај во Тетово се чувствува како дома
Рамуш Харадинај, поранешниот косовски премиер и командант на ОВК, денеска стана почесен граѓанин на Тетово. По средбата со лидерот на ДПА, Мендух Тачи, и откако се поклони на гробот на Арбен Џафери, Харадинај замина на свеченоста пред општинската зграда каде му ја врачија титулата почесен граѓанин.
Денеска пред општината во градот има многу полиција. Најавен беше и протест со кој партијата „Достоинство“ сакаше да искаже револт против доделувањето на признанието на Харадинај, но кога активисти на партијата претпладнево дошле пред зградата биле пречекани од близу двесте поддржувачи на Харадинај и за да не дојде до инциденти и поради безбедносна проценка, „Достоинство“ се повлекле од протестот.
- Домашните екстремисти изградија споменици и музеи на ветераните на УЧК, ги амнестираа, преименуваа улици и како да беше малку сето тоа, денеска денеска му даваат одликување на командант на УЧК, кој со формации во 2001 година од Косово влегуваше во Македонија и ги напаѓаше бранителите, а неговиот брат беше командант на 113. бригада на УЧК во кумановско-липковскиот регион. Бараме од ВМРО-ДПМНЕ да го спречи овој срамен чин, незаконски пред сè, и да спречи доделување на титулата почесен граѓанин - рече лидерот на „Достоинство“, Стојанче Ангелов за „Плусинфо“.
Сепак, Харадинај го доби своето одликување и рече дека во Тетово се чувствувал како дома, додека насобраната маса го скандираше неговото име виорејќи знамиња на Косово и на Албанија.
- Тука се чувствувам како да сум онаму каде што сум роден. Тетово е нашата историја и одлично е да се оди напред не само кога е лесно и кога се живее мирно. Оваа почит не е само за денес, туку и за во иднина. Ветувам нема да ве посрамам – изјави Харадинај во Тетово, пренесе „Република“.
Советниците од македонските партии не учествуваа на доделувањето на признанието на косовецот Харадинај. Одлуката е изгласена незаконски без бадентерово мнозинство бидејќи за неа гласаа само советниците на албанските партии, а македонските партии ја бојкотираа седницата. Инспекторатот за локална самоуправа доби претставка од советниците на македонските партии, за ова кршење на законските процедури за доделување титула „почесен граѓанин“, а директорот на инспекторатот Ванчо Шехтански најави дека одлуката ќе ја поништи. Сепак, одликувањето на Рамуш Харадинај се случи пред Шехтански да го спроведе законот.
http://plusinfo.mk/vest/79014/Pochesniot-gragjanin-Ramush-Haradinaj-vo-Tetovo-se-chuvstvuva-kako-doma
______________________
Si vis pacem, para bellum
