ВОЕНИОТ МУЗЕЈ НА ОТВОРЕНО ЧЕТИРИ ГОДИНИ ЗАТВОРЕН ВО ФИОКА
Воениот музеј во Скопје с` уште ја чека отворената поставка, односно Паркот на воената историја, кој беше најавен за крајот на 2009 година. На платото под бедемите на скопското Kале требаше да се постават тенкови, топови и воена опрема од различни периоди, информативни табли и да се отвори продавница за сувенири. Министерството за одбрана последен пат најави дека оваа поставка ќе биде изложена до крајот на минатата година, а вчера не одговори до каде е проектот. Последното објаснување е дека проектот е скап и за него треба време.
По углед на речиси сите светски воени музеи, и македонскиот уште пред четири години требаше да добие поставка на отворен простор. На платото пред скопската тврдина требаше да се најдат ретко оружје и опрема, реконструкција на ров и бивак од Македонскиот фронт од 1915-1918 година, оружје и оклопни борбени возила од Втората светска војна... Меѓу ексклузивните предмети требаше да бидат изложени ретки британски кујни од Првата светска војна, орудија од таа војна, еден од првите тенкови „шерман“, употребени кај нас, извидувачко возило „м-8“ од Втората светска војна...
Паркот на воена историја не е единствениот „заборавен“ проект на Воениот музеј. Уште пред четири години беа најавени и Регистар на македонски војници и настани и онлајн-поставка, во која на интернет ќе може да се видат голем дел од експонатите со кои располага музејот.
Во регистарот треба да бидат забележани имињата на сите учесници во буни, востанија и војни водени на територијата на Македонија. Сите учесници во борби, семејства на учесници или граѓани што имаа информации или сведоштва за борци преку посебен формулар ќе може да регистрираат име во регистарот, кој треба да биде јавно достапен список.
Воениот музеј беше основан во 2006 година, доби објект во касарната „Гоце Делчев“ во Скопје и комплетира неколку збирки предмети. Уште тогаш музејот во својот двор постави неколку експонати - топови и други артилериски орудија. По една година, музејот беше затворен, а зградата му беше предадена на користење на МВР. Министерството за одбрана во 2009 година ја врати Службата за воена историја - Воен музеј и најави атрактивни содржини. Тогаш Владата на Воениот музеј му додели 400 квадратни метри простор во објектот на Музејот на Македонија, а за втора локација, за отворена поставка, беше избрано скопското Kале.
Во просторот во Музејот на Македонија требаше да бидат изложени предмети од воената историја на Македонија од антиката, преку Самуиловото Царство, Kрали Марко, востанијата во Отоманската Империја, предмети од историјата на Македонскиот хусарски полк во Украина, што руската кралица Елисавета Петровна во 1759 година го формирала од доселеници од Македонија, балканските и светските војни, до денешните мировни операции на АРМ.
ЗАСЕГА САМО СО СПОМЕН-СОБА ЗА ГЕНЕРАЛ МИХАЈЛО АПОСТОЛСКИ
Воениот музеј официјално беше отворен во декември 2011 г. со изложба на фотографии „Нобеловците и АРМ за мирот“ во просториите што му се доделени во Музејот на Македонија. Фотографии од мировните операции на АРМ се првата поставка на Воениот музеј. Сега има спомен-соба на генерал Михајло Апостолски, неговиот мебел и библиотеката, која има околу 5.000 наслови, од кои илјада имаат статус на библиотечно богатство, односно се постари од 100 години.
http://www.dnevnik.com.mk/default.asp?ItemID=F78F9F8058CDFB40A6358576137265D6
