Важно е Kриволак да стане НАТО-центар, но поважно е да се изнајмува
Поважно е полигонот Kриволак комерцијално да се користи, да им се изнајмува на сојузниците за воени вежби, отколку формално да стане регионален или НАТО-тренинг центар, велат во Генералштабот на АРМ. И АРМ и Министерството за одбрана го рекламираат армискиот полигон Kриволак како место за вежби за странските армии. Полигонот се споменува во сите билатерални и регионални средби, на сите состаноци со НАТО, со Јадранската група, а гласот за полигонот го шират и армиите што таму веќе изведувале вежби, велат во Генералштабот. За полигонот има и промотивен видеоматеријал, кој редовно им се презентира на сојузниците. Министерството за одбрана го промовира полигонот како иден НАТО-центар за обука. Целта е полигонот комерцијално да се промовира и да стане ставка за полнење на воениот буџет. Но, во Генералштабот велат дека е примарно полигонот да се користи, па дури и да не биде регионален центар.
- Практично секогаш и секаде го нудиме Kриволак. Се споменува и пред Северноатлантскиот совет, и на форуми на началници на генералштабови, и на регионалните состаноци... Долго се работи на концептот тој да стане регионален центар, многу е вложено во подобрување на условите, а с` уште напорно се работи - изјави полковник Мирче Ѓорговски, началник на канцеларијата за врски на Генералштабот.
Полигонот, според воени извори, се нуди и во командите на НАТО. Главната предност во споредба со други воени полигони се карактеристичниот терен и климатските услови, големината на полигонот, различните вежбалишта, но пред с` – цената.
- Словенците првпат дојдоа на Kриволак затоа што им беше прескапо да вежбаат на Kрит. Тогаш видоа и дека нашиот полигон има многу подобри услови за обука и тренинг - велат во Генералштабот. По серија вежби на Kриволак, Словенците го рекламираат полигонот, велат воени извори. На полигонот досега вежбале војски на повеќе од 35 земји. По вежбите на првиот контингент што на Kриволак се подготвуваше за мисијата ИСАФ во 2007 година, Британците го нарекоа полигонот „мал Авганистан“.
- Kриволак е неприкосновен како полигон за подготовка за Авганистан. Поседува екстремни климатски услови, ладни зими, топли лета, силен ветер, екстремни теренски услови... Нуди можности за изведување теренска обука и гаѓања за сите родови и служби - авијација, тенковски, артилериски единици, пешадија, противвоздушна одбрана, инженериски, специјални единици... Сега има специјализирани вежбалишта по сите стандарди на НАТО, со автоматски уреди, специјализирана куќа за гаѓање... - вели Ѓорговски.
Тој нагласува дека ова е еден од ретките полигони каде што во реални услови може да се распореди една бригада. На полигонот може да се сместат 2.700 луѓе во шатори, 388 во контејнери, 70 во бунгалови и 465 во објекти од тврда градба.
Со проектот за надградба на полигонот, кој е во тек, се изградени вежбалиште за борба во урбани услови, „авганистанско село“, планинско вежбалиште, „африканско село“, вежбалиште за операции на конвои, нов инженериски полигон...
Според Ѓоргоски, полигонот има и еколошка студија, со која ќе се заштити деградацијата на животната средина при воени вежби.
http://www.dnevnik.com.mk/default.asp?ItemID=507E4DA88AA0A040930F78BB7AAB406F
