Генералот Котески го понуди „Криволак“ за обука на српската војска
Македонскиот армиски полигон ќе се користи и за заедничка обука помеѓу припадниците на двете армии, особено во подготвителниот период пред упатување во мировни мисии, информира ГШ на АРМ.
Во официјална посета на Армијата на Република Македонија престојува висока делегација на Војската на Србија, предводена од началникот на ГШ генералот Љубиша Диковиќ. Делегацијата во ГШ на АРМ беше пречекана со високи воени почести, а домаќин е началникот на ГШ на АРМ генерал-мајорот Горанчо Котески.
На средбата како што информира ГШ на АРМ станало збор за унапредување на билатералната воена соработка. Потоа за размена на искуствата со АРМ од учеството во мисиите надвор од Република Македонија, за примена на Концептот за оперативните способности на декларираните единици, како и за заемно користење на капацитетите за обука во двете армии.
По официјалната средба, генералите Котески и Диковиќ ја нагласија одличната соработка помеѓу двете армии за која се сложија дека се развива во нагорна линија и дека во наредниот период ќе се интензивира.
„Генералот Котески истакна дека на средбата на гостите од Република Србија им е понудено користењето на армискиот полигон, ,Криволак“, како за изведување обука за потребите на Војската на Србија, така и за заедничка обука помеѓу припадниците на двете армии, особено во подготвителниот период пред упатување во мировни мисии. Тој ја потврди соработката со центарот за атомско-биолошка и хемиска одбрана (АБХО) во Република Србија, во кој ќе продолжат да се обучуваат стручни кадри на АРМ, но и ја истакна можноста за обука на припадници на АРМ за специјалности кои на АРМ и се неопходни за одржување на одредени борбени технички средства во соодветни центри за техничка служба на Војската на Србија“, информира ГШ на АРМ.
Генералот Диковиќ не го криеше задоволството од соработката со АРМ, при што истакна дека двете армии имаат можност за проширување на соработката на повеќе полиња и дека Војската на Србија е заинтересирана за употреба на ,,Криволак“, но и за поддршка на веќе започнатите проекти за регионална соработка.
Двајцата началници, ја искажале заложбата за поддршка на проектите што се во доменот на обуката на регионално ниво, при што посебно било истакната и иницијативата на Кралството Норвешка за формирање на Балкански воено-медицински сили.
По средбата во ГШ на АРМ, делегацијата на Војската на Србија посетата ја продолжи во касарната ,,Илинден“, каде што ќе биде презентиран полкот за специјални операции на АРМ.
http://www.mkd.mk/makedonija/politika/generalot-koteski-go-ponudi-krivolak-za-obuka-na-srpskata-vojska
