Си реков да не ставам више вакви текстови ама ај нека им биде...
Македонски војник на 21 век како од филмовитеПроектот „Војник за 21 век“ ќе ги опреми специјалните единици со дигитални маскирни униформи, минијатурни летачки дронови, електронски визири за ноќно гледање, топлотни скенери и ласерски нишани поставени на специјални пушки како во научнофантастичните филмови
АРМ в година ќе има поголем буџет за 1,7 милион евра, но за модернизација на војската се предвидени 115.000 евра
АРМ МОЖЕ БАРЕМ ДА ЈА ОСОВРЕМЕНИ ПЕШАДИЈАТА
Македонската армија од наредната година со зголемувањето на проектираниот буџет ќе добие 1,7 милион евра повеќе, а од овие пари за модернизација на војската планирано е да бидат потрошени 115.000 евра. Овие пари не се доволни за да се спроведат сите неостварени проекти, како „АРМ мој вистински дом“, кои со години доцнат, односно со нив не може да се изврши комплетна модернизација и набавка на неопходните авиони и оклопни возила, кои чинат многу.
Сепак, тие во некоја мера можат да се искористат да се протуркаат поевтините варијанти за осовременување на нашата војска за таа да може да ги следи стандардите на НАТО.
НЕМА ПАРИ ЗА АВИОНИ
Министерството за одбрана сѐ уште официјално не се произнесува дали во својот приоритет уште го има спроведувањето на ланскиот проект „Војска за 21 век“, 115.000 евра наменети за модернизација би можеле да ја завршат работата.
Станува збор за опремување на армиските специјални единици, а потоа и на целата пешадија со опрема за војување, која е последен крик на технологијата.
Планот подразбира опремување на војниците со дигитални маскирни униформи, минијатурни летачки дронови, електронски визири за ноќно гледање, топлотни скенери и ласерски нишани поставени на специјални пушки како во научнофантастичните филмови.
Ако се купи целата опрема што е планирана, сите овие орудија би можеле да станат многу скоро секојдневие во работата на македонските војници.
„Нова Македонија“ во својата анализа се обидува да пресмета колку всушност би нѐ чинела модернизацијата од овој тип.
Иако домашната стручна јавност не можеше да ни одговори на прашањата, сепак според важечките цени што се споменуваат во странските специјализирани медиуми, опремувањето на војниците се движи од 30.000 долари по чета, до 70.000 фунти поединечно по војник.
СКАПИ И ЕВТИНИ СВЕТСКИ ИСКУСТВА
Лондонски „Телеграф“ стигнува до заклучок дека еден современ војник на Британија за 21 век, кој е опремен со футуристички пакети на комуникација и навигација и најново оружје, вреди околу 70.000 фунти.
- Технологијата константно ја менува работата, но и средствата со кои работи еден армиски војник. По некои процени, на британската компанија „Иднина, пешадија, војник, технологија“ (Future Infantry Soldier Technology-FIST) се стигнува до заклучокот дека токму оваа технолошка промена влијае и на цената на модерните војници, кои се на фронтовите каде што се војува - пишува лондонски „Телеграф“.
Интернет-порталот „Aрми-технолоџи“ во 2005-та проценил дека за извршената целокупна модернизација на опремата на своите армиски пешадиски единици за намените и безбедносните предизвици во 21 век Британија потрошила 105 милиони фунти.
- Парите се потрошени во високотехнолошки армиски орудија, кои се сега стандардни и на војникот му помогнаа тој да е способен многу лесно да командува со своите колеги и да има контрола на теренот, која е збогатена со воено-разузнавачки податоци - додава порталот.
„Њујорк-пост“, пак, на оваа тема пишува дека реално не може да се изврши пресметка колку „војниците на иднината“ всушност ја чинат американската војска, бидејќи тоа е процес што константно се обновува и надградува на идентичен начин како што се развива армиските гаџети од сите сфери.
- Војните во Ирак и во Авганистан изминативе години едноставно го присилија Пентагон долгорочно и стратегиски да инвестира во оваа област, па програмата на американската армија „Арми фјучр комбат систем“ (Army’s Future Combat System), која има цел практична употреба и развој на роботи, сензори, дронови и возила во секојдневните функции на пешадијата, се проценува дека вреди над 160 милијарди долари - наведува весникот.
Американската телевизија Фокс њуз во својата анализа како ќе изгледа американскиот „Супервојник во 2030 година“ тврди дека цените за оваа цел ќе летнат до таванот на издржливоста на воениот буџет и тие ќе бидат астрономски, бидејќи се претпоставува дека врз војниците ќе бидат извршувани и хируршки интервенции за вградување механички делови (exoskeleton), кои би им дале супермоќ на маринците.
ДОБЛИЖУВАЊЕ ДО ИЗРАЕЛСКИТЕ СТАНДАРДИ
Пензионираниот полковник Благоја Марковски вели дека оваа инвестиција на македонската армија, доколку биде остварена, ќе биде одличен потег во вистински момент.
- Ова модернизирање со опремата за „Војник на 21 век“ е предуслов со чие остварување АРМ ќе се доближи до стандардите на израелската војска - вели Марковски.
На овој проект, вели полковникот, се работи неколку години наназад, а за таа цел првите луѓе на Министерството остварија неколку службени посети на Израел, каде што беа запознаени со предностите на напредната воена техника.
- Сите овие средства би овозможиле подобро функционирање на македонските војници во сите временски услови без никаков проблем. И самите војници, снабдени со најмодерната опрема, би се чувствувале многу посигурно и би постигнувале многу подобри резултати - вели Марковски.
Аналитичарот сепак резимира дека проектот за лично опремување не треба да е изолиран од глобалната, севкупна модернизација на АРМ.
- Ваквата форма на модернизирање за војните на иднината треба да е проект што подразбира дигитализација на комплетниот механизам на одбраната на Македонија и тој е единствена цел кон која се стреми државата во опремувањето на нашата армија - истакнува Марковски.
ШМИНКА И ФАРСА
Наспроти него, балканскиот познавач на безбедносните услови Мирослав Лазански објаснува дека опремувањето на војниците како роботи од холивудските филмови е тренд што симултано се случува изминатиов период во сите земји од поранешна Југославија.
- Не сум воодушевен од еуфоријата што ја предизвикува концептот „Војник на 21 век“, иако овој процес почна да се спроведува во Македонија и во земјите од опкружувањето. Сето тоа е само една маска за да се оттргне вниманието од суштинските проблеми на одбраната на секоја од балканските земји - вели Лазански.
Сѐ што на голема врата наскоро ќе почне да се промовира на Балканот поврзано со модерното опремување на војниците, вели Лазански, за Западот не е ништо ново.
- Инфериорноста на армиите од Балканот, со исклучок можеби на Турција и на Грција, во споредба со армиската опременост на развиените земји, ги принуди првите луѓе на министерствата за одбрана да најдат алтернативен метод за промоција на војските во регионот, кои, во суштина, и не се добро опремени. Со овие нови гаџети, униформи и шминка во опремата на војниците, секоја земја поединечно ќе се фали само пред новинарите. Сѐ е, во суштина, само една голема фарса - истакнува Лазански.
Тој е дециден дека на секоја балканска земја итно ѝ се потребни хеликоптери, авиони, бродови и тенкови за да се поднови арсеналот на вооружување, а овој недостиг се затскрива со минимално инвестирање во добро популизираниот концепт „Воин на 21 век“.
- Дигиталните екрани, на кои се гледа нишанот на пушките, земјените радари и џипиес-системите, на пример, во Франција и во Англија ги поседуваат ловџиите, бидејќи и не се некоја инвестиција, а може да се набават во продавниците за електроника. На овој начин, со овие уреди тамошните ловџии убиваат диви свињи по планините - објаснува Лазански.
Единственото нешто што ќе го сторат балканските земји со вградувањето на овие уреди во индивидуалната опрема на нивните војници, оценува Лазански, е да ги оспособат во ранг на ловџиите на Западна Европа.
- Наместо трошење пари за шминка на војската како во научнофантастичните филмови, препорачувам луѓето што се занимаваат со менаџирање на финансиите на одбраната на балканските земји истите пари да ги пренасочат на купување капитални орудија, кои би ја гарантирале безбедноста на регионот - резимира Лазански.
http://www.novamakedonija.com.mk/NewsDetal.asp?vest=10713929573&id=9&prilog=0&setIzdanie=22996
