Артан Груби, поранешниот претседател на невладината организација „Разбуди се“ и сегашен шеф на кабинет на лидерот на ДУИ, Али Ахмети се појави во судница на стартот на судењето за тепачките на Кале, но судењето се одложи, поради отсуство на дел од обвинетите.
Вкупно 16 учесници во тепачката поднеле жалба на првата пресуда на судот, според која на 51 обвинет им беше изречена условна казна.
Седуммина од обвинетите кои поднеле жалба на пресудата не беа присутни, а дел од нив не биле уредно поканети. И Груби не добил покана за судењето.
По одлагагањето на судењето, Груби не даде изјава за медиумите. Единствено Екрем Долек, претседател на здружението на пазарџии кој што е исто така обвинет за тепачките на Кале вели дека на Калето ги раздвојувал тепачите, но не учествувал во нив.
„Со настаните на Калето, се најдов во една ситуација народно кажано како гуска во магла. Од мојата наивност и од моето правично гледање на работите, не можев да предвидам дека се работи за една изрежирана валкана игра и буквално се најдов како гуска во магла“ вели Долек и додаде дека во неговото здружение досега создале едно мало мултиетничко општество без да се гледа на тоа кој од која националност е.
„Кога се случија настаните дознав од медиумите. Од одредени причини јас и мојот секретар излеговме на Калето за да ги искористам медиумите и да кажам некои работи и да повикам на соживот и тоа го повикав но недна од телевизиите не ја емитуваше мојата изјава. Учествуваме во инцидентот, но во делот на разделување, бевме заедно со специјалната полиција за да не дојде до поголем конфликт, затоа што тука немаше кај да се оди, или да влезеш да тепаш или да раздвојуваш. И јас се чудам зошто сум обвинет“ вели Долек.
Во февруари минатата година се случи жестока тепачка на скопското Кале помеѓу поддржувачите и противниците на изградбата на црквата – музеј.
Едната група беше предводена од Артан Груби тогашен претседател на невладината „Разбуди се“, а втората група беше навивачката група Комити. И тогашниот заменик министер за внатрешни работи, Џевад Бучи беше на местото на инцидентот и лично им ги симна лисиците на дел од уапсените.
Артан Груби сега е шеф на кабинетот на лидерот на ДУИ, Али Ахмети, а кога се случи инцидентот беше вработен во холандската Амбасада.
Во приговорот до судот, Груби навел дека не стои зад демонстрациите и дека не учествувал во физичката пресметка./крај/фф
