БУЏЕТИТЕ НА АРМИИТЕ ОД БАЛКАНОТ ЗАВРШУВААТ ВО НАТО
Вооружувањето со европски и со американски пушки - задолжително?
Има ли алтернативи при вооружувањето на армиите од Балканот со пешадиско стрелачко оружје? Дали т.н. интероперабилност на балканските армии со НАТО подразбира и задолжително вооружување и купување оружје од НАТО? Каде ќе завршат големите контингенти „конзервирани“ калашњикови
Се чини дека полека но сигурно југословенска верзија на светски познатата автоматска пушка „калашњиков“, која беше главното „лично пешадиско оружје на ЈНА“, а остана како такво долги години по распадот на Југославија, го губи приматот во полза на европски и американски модели на автоматски оружја. Последен ваков пример во кој некоја држава од поранешната Југославија започнува да го менува главното оружје на пешадијата неодамна беше регистриран во Србија. Има ли алтернативи при вооружувањето на армиите од Балканот со пешадиско стрелачко оружје? Дали т.н. интероперабилност на балканските армии со НАТО подразбира и задолжително вооружување и купување оружје од НАТО? Каде ќе завршат големите контингенти „конзервирани“ калашњикови?
Белгиска пушка во рацете на српските војници
Балканските медиуми деновиве најавија дека Србија наскоро ќе започне со набавка на современа автоматска пушка „скар - Л“, која е произведена во погоните на белгиската фабрика „ФН Херштал “. Од Министерството за одбрана на Србија потврдија дека со овие нови пушки ќе бидат опремени оние единици што извршуваат посебни операции и задачи. Набавката на овие нови пушки во српската јавност го добила називот „проект 1.500“, бидејќи оружјата за почеток биле наменети да опремат точно 1.500 војници со најсовремена опрема и вооружување.
- Автоматските пушки користат 5,56-милиметарска муниција и се од моделот „скар - Л“, а бројот и цената на набавените пушки се окарактеризирани како доверливи информации, но се дел од програмските документи за опремување и модернизирање на српската војска - велат упатените во набавката.
За разлика од многуте пушки што се користат во денешницата од многу армии во светот, „скар - Л“ е оружје на 21 век. Развојот на пушката бил инициран во 2004 година, а истата година тие првпат биле употребени во практиката од страна на американските сили.
- Откога пушката ја прифатија американските специјалци, таа стана популарна меѓу армиите во светот и моментално е присутна во борбените дејства во Авганистан и во Ирак. Според расположливите информации, оружјето, освен САД, го користат и војските на Белгија, Турција, Индија и Јапонија - објаснуваат експертите.
Македонија
Во Македонија, пак, и натаму доминантно оружје на пешадијата се југословенските автоматски пушки произведени во фабриката за оружје во Крагуевац, Србија, а тоа се моделите на автоматите „М-70“ и „М-70А“ и снајперската пушка „М-93 црна стрела“.
Од АРМ официјално објаснија дека вооружувањето и опремата на единиците на војската се во согласност со воената класификација, а нивните модели се јавно објавени.
- Според воената класификација, оружјето се дели на пешадиско лично вооружување и опрема наменети за сите единици во АРМ, каде што спаѓаат автоматските пушки, снајперски пушки, пиштоли, и на колективни борбени средства, каде што се вбројуваат артилериското оружје и опремата за него - велат од АРМ.
Во меѓувреме, неофицијално но регистрирано од камерите и фотографиите на медиумите на воените паради, смотри и мировни мисии надвор од државата, нашите армиски специјални сили ги користат моделите на американската пушка „колт М-4“ и германскиот „хеклер“.
Црна Гора, покрај големиот странски арсенал, развива и домашна пушка
Најмалата југословенска република, Црна Гора, која е формално во процес да стане најнов член на НАТО, својата пешадија во најголем дел ја опремува со пушките од југословенската ера од моделите „М-70“ и „М-72“. Покрај овие основни оружја, црногорската војска ракува и со австриската пушка „штаер “, германската „Г -33“. Според пишувањата, пак, на подгоричките медиуми, во скоро време се очекува оваа земја да ја пушти во употреба автоматската пушка од домашно производство „тара ТМ -4“, која во овој момент сѐ уште е во фаза на тестирање.
Хрватска со американска пушка и сопствено оружје, но со НАТО-стандарди
За разлика од мноштвото поранешни југословенски републики, хрватската војска во одбраната на државата, освен пушките што потекнуваат од времето на некогашната ЈНА, користи американскo автоматскo оружје „М-4“, но и сопствен модел на јуришна автоматска пушка „ВХС-Д“.
Оваа високомодерна хрватска пушка првпат во употреба е пуштена во 2009 година, а освен од хрватската војска, таа се користи од вооружените сили на Ирак и армијата на Филипините. Компанијата „Продукт“, која ја произведува пушката одреди цена по модел за ова оружје што изнесува 10.000 куни. Пушката е долга меѓу 765 и 950 милиметри, тешка е 3,5 кг, може да испука 850 куршуми во минута, а користи муниција по НАТО-стандарди, со калибар од 5,56 милиметри.
Босанските сили со најшарена палета автоматски пушки
Во Босна и Херцеговина, пак, тамошната пешадија користи шаренолико вооружување на своите пешадиски трупи, добиено главно од донации по завршување на војните во 1990-тите години. Во палетата пушки што ги користи оваа војска влегуваат американските пушки „М-16“, „М-4“ и „АР-15“, германските „хеклер“ - „Г 36“ и „Г 3“, кинеската пушка „Т -91“, рускиот пушкомитралез „бизон“ и југословенската пушка со двата модела „М-70“ и „М-72“, произведена во фабриката „Застава “ во Крагуевац.
Словенија се брани со белгиска супермодерна пушка
Покрај неколкуте модели на југословенската пушка, словенечката армија во својата секојдневна употреба веќе неколку години ја користи белгиската автоматска пушка „ФН 2000“. Оваа пушка е дизајнирана и произведена во 1995 година во Белгија, а пуштена е во армиска употреба во 2001 година. Таа располага со четири специјални варијанти и модели, во зависност од потребите за нејзината армиска употреба. Тежината на оружјето е 3,6 кг, основниот модел е долг 688 милиметри, а тактичкиот модел на „ФН 2000“, кој меѓу другото може да се користи како снајпер, е долг 744 милиметри. „ФН 2000“ е широка 81,3 милиметар. Оружјето користи НАТО-муниција од 5,56 милиметри, а во една минута може да испука до 850 куршуми. Оваа белгиска пушка има ефективен дострел од 500 метри, а на себе може да ги носи сите модерни електронски уреди, кои му ја олеснуваат на војникот употребата на оружјето.
новамакедонија
