Полковник Арсоски - прв човек на армиските специјалци
Во годината кога се прославува јубилејот "20 години АРМ" елитната единица го добива четвртиот командант од неговото формирање
Со церемонијално предавање на военото знаме и со свечено дефиле на единиците, вчера во касарната Илинден беше назначен новиот командант на Полкот за специјални операции - пСО.
Првиот човек на армиските специјалци е полковник Павле Арсоски кој новата функција ја прими од неговиот колега, полковник Зоран Додевски кој пак, после четири години на чело на специјалната единица заминува на нова функција.
- Голема чест, но и голема одговорност е да се биде на чело на најелитната единица во АРМ. Не е лесно да се раководи и командува со припадници кои биле во мировните мисии и кои на своите гради носат повеќе од 300 одликувања, а 60 отсто од нив учествувале и во борбени дејствија, порача генерал-мајор Горанчо Котевски.
Во годината, нагласи, кога го прославуваме јубилејот "20 години АРМ" полкот за специјални операции го добива четвртиот командант од неговото формирање.
- Да се биде на чело на надалеку прославените македонски Волци и Ренџери кои поседуваат борбено искуство стекнато во разни мисии за секој командант претставува огромна обврска да остане доследен во исполнувањето на вредностите од препознатливото мото Повеќе од можното" кое го краси полкот. Затоа на командантот Павле Арсоски му посакувам да продолжи по патот на успехот и перманентното издигнување на рејтингот на единицата со која тој ќе командува, нагласи генерал-мајор Котески.
Новиот командант на полкот за специјални операции, искажувајќи благодарност на неговиот претходник, рече дека довербата и одговорноста која му е доделена со назначувањето за командант му претставува исклучителна чест и привилегија.
- Довербата и одговорноста која ми е доделена со моето назначување за командант на полкот за специјални операции ми претставува исклучителна чест и привилегија. Особено поради тоа што станува збор за елитна единица на АРМ која се подготвува за извршување на најделикатните и, во принцип, високоризични мисии и задачи, кои понекогаш се мали по обем, но најчесто имаат ефекти на стратегиско рамниште. Обучувањето и извежбувањето на единицата, постојаното подобрување на борбената готовност, реализацијата на меѓународните обуки и вежби и сите други редовни и вонредни активности не трпат импровизации туку беспрекорно завршена работа. Во таа смисла очекувам посветена работа од сите припадници на полкот, истакна полковник Арсоски на свеченоста, на која присуствуваа и заменик-министерот за одбрана Емил Димитриев, претставници на Министерството за одбрана и АРМ, на централната и локалната власт и други високи гости.
Павле Арсоски е офицер кој во своето портфолио има запишано голем број одговорни функции. Со успех ги завршил највисоките воени школи во земјава и странство, одлично зборува германски и англиски јазик.
http://vecer.com.mk/?ItemID=AEA7AD67578E524B874A72E608FC372B
