Летечките полицајци го ризикуваат својот за да спасат туѓ животСедум хеликоптери има на располагање специјализираната хеликоптерска единица на МВР, која во ова време од годината постојано има акции за спасување изгубени планинари, а најмногу спасувачки мисии биле изведени со воздухопловот „Б-412“. Тие беа активни и во последниот случај кога полицискиот тим беше повикан за извлекување на телото на младиот планинар од Битола, кој возејќи велосипед, се лизнал од планинскиот пат и паднал во бездна длабока 30 метри каде што трагично загинал. Нашата репортерска екипа ја посети Хеликоптерската единица, која пред нас ги демонстрираа своите можности.
Полициските хеликоптери и специјалците интервенираат секогаш кога станува збор за извлекување повредени или за спасување лица од тешко пристапни места. Во недостиг на таканаречената горска служба за спасување, каква што има во сите развиени земји, полициските „тигри“ и хеликоптерската единица на МВР се оние на кои им се јавуваат кога има проблеми со изгубени или повредени планинари, алпинисти или излетници, а кои не можат да бидат спасени од Црвениот крст или од Дирекцијата за заштита и спасување.
Алпинистичкиот тим и Хеликоптерската единица на МВР интервенираат заедно кога станува збор за изгубени или повредени планинари. Хеликоптерската единица располага со три хеликоптери од типот „АБ-206“, „АБ-212“ и „Б-412“ и четири хеликоптери „МИ-17“.
Пилотите се искусни со завршено школување во поранешните југословенски земји, а повеќето што сега работат во оваа единица порано биле пилоти во армијата на Македонија.
Овие два тима заедно реализирале повеќе акции, а само годинава учествувале во три спасувачки акции, од кои последната беше пред два дена на Пелистер. Началник на одделот за воздухопловни единици е пилотот Драги Мицев.
- Пред околу еден месец спасивме 13 планинари од Скопје, кои се изгубиле на Водно. Меѓу нив имаше шест деца на возраст од 10-ина години, четири жени и тројца мажи. Тие од Kрстот на Водно тргнале кон Матка, но залутале. Потоа побарале помош на телефонскиот број 192, по што бевме ние повикани. Стапивме во контакт со планинарите и ни дадоа координати и ги лоциравме. Хеликоптерот најде во близина место за слетување и ги земавме 13-те изгубени излетници - вели Мицев, кој како пилот работи од 1991 година.
Полицијата за спасување најчесто го користи хеликоптерот „Б-412“ бидејќи овој хеликоптер поседува витло за спасување, односно сајла што се спушта и се крева.
На витлото може да се закачи и кошница за спасување, со која може да се кренат и повредени лица. Задолжително во секоја спасителна акција има и лекар од ЕСЗ.
Пилотот вели дека го користат и хеликоптерот „МИ-17“, кој исто така има сајла, но за овој хеликоптер потребно е подолго време за подготовка за да се стави во функција.
- Со кошницата, која се закачува на сајлата на „витлото“, може да се крене товар до 270 килограми. Сајлата има должина од 70 метри. Брзината, кревањето и спуштањето на кошницата или другата опрема се регулира со џојстик. Ова претставува модерен систем што го користат речиси сите служби за спасување во светот - вели пилотот Мицев.
На хеликоптерот „Б-412“ пред четири години дополнително било вградено витлото. Другите четири хеликоптери „М-17“ имаат фабрички вградено витло.
За да дејствува овој тим, оние што бараат помош првин треба да се јават во дежурниот оперативен центар на бројот 192. Од таму се бара дозвола за дејствување од министерот или од директорот на Бирото за јавна безбедност. Дејствуваат во текот на работното време, најмногу за 35 минути. Но ако станува збор за неработни денови, бидејќи немаат 24-часовно дежурство, на местото на несреќата стигнуваат за еден-еден и пол час.
Лидерот на алпинистичкиот тим на МВР, Горан Стрезовски, раскажува како се одвива една акција. Откако ќе се подготват, го лоцираат местото и ако повредениот е во свесна состојба, разговараат со него или со некој што е со него за да знаат што треба да земат од опрема бидејќи не е можно да се понесе целата опрема.
- Ако хеликоптерот не може да слета, тогаш лебди во воздухот и ние се спуштаме. Пилотот претходно прави процена дали може да лебди во место бидејќи тоа зависи од временските услови. Ако не, тогаш лета до најблиското место што е безбедно за слетување и потоа пеш одиме до местото на несреќата. Откако ќе стасаме до повредениот, го мобилизираме и на раце го транспортираме до хеликоптерот. Ако станува збор за непристапен терен, правиме жичница со јажиња, го извлекуваме повредениот и го носиме до хеликоптерот - вели Стрезовски.
Ако има можност, како што беше во случајот со повредениот планинар на Матка од пред три недели, тогаш хеликоптерот лебди во воздух, четворица алпинисти се спуштаат на земја и во зависност од повредите на планинарот, симнуваат носилка, пелена или кошница.
Една од најтешките и најспецифични акции за специјалците била пред околу четири години кога од непристапен и тежок терен извлекле тешко повредена алпинистка од Битола. Специјалците навреме стасале на местото, но спуштањето до повредената било многу отежнато поради струењето на воздухот. Но, и покрај сè, навреме ја извлекле и ~ дале прва помош, по што ја однеле во болница. Алпинистката, за жал, подоцна им подлегна на повредите.
- Нема лесна и тешка акција, сите се со висок ризик бидејќи одиме во најтешки услови каде што другите служби не можат да ја завршат работата - завршува Стрезовски.
Потешко од управување авионПилотите велат дека хеликоптерот е трипати потежок за управување од авион.
- Самата динамика е покомплицирана, хеликоптерот слетува и летнува вертикално и на мал терен. Освен тоа, и намената и задачите што ги извршува хеликоптерот се потешки, на пример, транспорт на луѓе и на опрема, контрола на сообраќај на државната граница, извидување на државната граница, спасување лица, превоз на ВИП-личности, потоа за комерцијални потреби на фирми за што оваа единица има изготвено и правилник - вели пилотот Мицев.
Недостигаат пилотиВо Хеликоптерската единица бројот на пилоти е минимален, што претставува и една од причините поради која пилотите не работата 24 часа. Проблемот, како што наведуваат, е што постарите колеги-пилоти заминале во пензија, а нови нема или има малку бидејќи во Македонија не постојат соодветни професионални школи.
- Моментално, во Хеликоптерската единица има двајца нови пилоти, кои ја завршија обуката. Други двајца пилоти сè уште се обучуваат и за една година и тие ќе ~ се придружат на единицата.
Хеликоптерската единица за полициски потреби има одобрение за обука на пилоти за потребите на МВР. Но обуката не започнува од нула. Пилотите што веќе се пријавиле мора да имаат спортска дозвола за летање или приватна дозвола за пилот на комерцијален лет. Ако кандидатите дојдат со овие дозволи, тогаш почнуваат со обука за пилоти во Хеликоптерската единица за полициски потреби - вели пилотот Мицев.
http://www.dnevnik.com.mk/?ItemID=82CB7E8F4375AB4DB829A05899FEE4FE 
