Со ротациски светла возат и тие што треба и тие што не требаГрадоначалникот на општината Аеродром со години се вози во „полициско БМВ“, со видно истакнати ротациски светла. Автомобилот му бил даден на привремено користење. Наводно не смеело од него да се извадат сирената и синото и црвеното светло. Тврдат дека досега не ги вклучиле, а додека возилото било кај нив нема ни да ги користеле
Законски е пропишано кои возила можат да носта ваква опрема
Злоупотреби со светлечка опрема за возила
Возила со различни варијанти на сино-црвени ротациски светла што им даваат првенство на минување во Македонија има стотици. Ги има на „опели“, „шкоди“, „фордови“, „мерцедеси“, „голфови“ и „ландровери“.
Опремата ја имаат полицијата, војската, царината, пожарникарската бригада и итната медицинска помош, но и градоначалници на општини, директори на затвори, директори на јавни претпријатија и агенции, лидери на политички партии и агенции за обезбедување. Ги употребуваат кога треба, ама често и кога не треба, кога за нив нема некоја исклучителна потреба, кога некому му се брза.
Опрема што лесно се набавува
Претекнуваат и од лево и од десно, се качуваат на тротоари или минуваат преку тревници. Сакаат што поскоро и полесно да минат низ сообраќајниот метеж. Да не се чека на семафор, за побрзо да се стигне на работа или да се појде на состанок. Се ставаат дури и како статусен симбол. Лесно се набавуваат, за дваесетина евра на Интернет, а ги има дури и во слободна продажба, низ продавниците за автомобилски делови и на пазарите.
Казните за незаконско користење се само парични, злоупотребите внатре во службата не се ни казнуваат, па состојбата со повластениот статус во сообраќајот станува хаотична.
- Осветлување и сирена не им следуваат на сите. Право на користење имаат само највисоките државни функционери. Законот прецизира кои точно имаат првенство на минување. Секоја држава посебно го уредува користењето на светлата за привилегирано движење во сообраќајот. Се прави процена за работата што се извршува и врз основа на тоа се издава или не се издава дозвола за користење. Порано, на пример, кога државата беше силно централизирана, ротациски светла имаа мал број возила. Сега е поинаку. Но, како и да е, законот мора да се почитува и секоја злоупотреба мора да биде санкционирана - вели Трпе Стојановски, професор на Факултетот за безбедност во Скопје.
Злоупотребата тешко се утврдува
Тешко е, напоменува професорот Стојановски, да се утврди злоупотребата на ротациските светла инсталирани на службените автомобили и таа да се санкционира. Проблемот со евентуалната злоупотреба би бил решен кога возачот би бил должен да ја евидентира секоја, па и најкратката употреба на посебната сигнализација, како што го прават тоа кога употребуваат палка или пиштол. Врз основа на евиденцијата, според Стојановски, лесно е да се утврди дали употребата на ротациските светла била дозволена или не.
Право на користење, како што ни е потврдено од Министерството за внатрешни работи, имаат полицајци кога тоа е неопходно за ефикасно и безбедно извршување на службената работа што не трпи одложување, итната медицинска помош и пожарникарите при ургентна интервенција, кога брзаат некому да му го спасат животот, како и сите возила што се придружба. Ги вклучувале и возилата на Управата за извршување санкции кога превезувале лица лишени од слобода. Дали привилегија да користат „ротација“ имале одделни градоначалници, директори на јавни претпријатија и агенции за обезбедување не знаеја да ни кажат.
- Уреди за давање посебни светлосни и звучни знаци смеат да се вградуваат само на возила определени со закон и со акт на Владата на Република Македонија. Тоа, главно, се возила на полицијата, воената полиција, царината, јавното обвинителство и судот. Тие возила имаат право на првенство на минување во однос на сите други возила. Кој смее да има ротациски светла и кога смее да ги користи во детали е предвидено во Законот за безбедност во сообраќајот - велат од Министерството за внатрешни работи.
Градоначалникот на општината Аеродром со години се вози во „полициско БМВ“ со ротациски светла.
Автомобилот ја има целата опрема за привилегирано минување. Има сино-црвени светла и сирена, со кои, ако затреба, може да помине кога сака, каде сака и како сака.
- Станува збор за службено возило, кое ни е дадено на привремено користење, заедно со ротациските светла. Возилото ќе се врати, а дотогаш опремата нема да се користи како што не се користела ни досега - информираат од општината Аеродром.
http://www.novamakedonija.com.mk/NewsDetal.asp?vest=12512926186&id=12&prilog=0&setIzdanie=22747 
