Трајанов: Конфликтот во Сирија е со можни последици за Македонија
Учеството на македонски државјани во борбите во Сирија може да има безбедноси последици по Македонија, додека импликациите на дипломатски план и во меѓународните односи засега не се веројатни, наведуваат соговорници на Дојче веле во анализа на темата.
Конфликтот во Сирија и учеството на македонски државјани на страна на опозицијата носи потенцијална опасност и за Македонија, смета пратеникот и поранешен министер за внатрешни работи Павле Трајанов.
Тој во анализа на Дојче веле за причините и за последиците од учеството и на македонски државјани во граѓанската војна во Сирија, вели дека може да има дури и одмазднички акции од страна на Сирија.
- Сирија или нејзините сојузници можат да преземат одмазднички активности, со што е можно да ги загрозат нашите дипломатски претставништва и други наши интереси. Второ, припадниците на паравоените формации по враќањето можат да преземат некои радикални активности и во Македонија – вели Трајанов.
Тој смета дека учеството во странски воени сили е спротивно на македонските закони и дека сите тие учесници во паравоени или воени формации да сносат и кривична одговорност.
- Државните институции, пред сѐ, безбедносните служби, имаат обврска да ги следат ваквите појави и да дејствуваат превентивно – вели Трајанов. Тој потенцира дека опозицијата во Сирија има меѓународна поддршка и дека регрутацијата на „борци” во нејзините редови некогаш го вршат моќни центри, наведува Дојче веле.
Исклучени дипломатски последици
Што се однесува до последици на меѓународен дипломатски план, тие засега се исклучени или малку веројатни, сметаат соговорнците.
- Сите држави- членки на ОН имаат обврска да спречат активности на поединци или групи насочени кон изведување, поттикнување или помагање на терористички активности, меѓутоа, само ако тие активности – обука, оружје, финансирање и логистика, се спроведуваат на нивна територија. Според јавно достапните информации, трите лица по потекло од Македонија кои загинаа во Сирија, не биле подготвувани ниту регрутирани на македонска територија, туку тоа го направиле преку други држави, во случајов преку Австрија и Германија. Во овие случаи Македонија не може да предмет на санкции, освен во ситуација кога надлежните институции би располагале со податок дека токму од кај нас е организирано нивното заминување во Сирија – објаснува Стево Пендаровски, универзитетски професор од Скопје и експерт за безбедносни прашања и меѓународна политика.
МВР пак засега се надева дека нема да има последици и се потпира на тоа што Македонија е дел од глобалната антитерористичка коалиција.
- Се надеваме дека тоа нема да има импликации за Македонија. Земјава учествува во глобалната коалиција за борба против тероризмот. Ако има ризик, подготвени сме да реагираме – вели Иво Котевски, помошник – министер за комуникации.
Причините за заминување се лични
МВР нема прецизни податоци колку граѓани од Македонија се заминати во Сирија.
- Со службите од регионот разменуваме информации, но сознанијата за индивидуални учества во борби во Сирија и во други кризни региони се оперaтивни и не се знае точниот број на лица што заминале таму – вели Котевски.
Германското радио објавува неофицијална проценка дека на страната на опозицијата во Сирија војуваат околу 140 Албанци од Косово, Албанија, Македонија и Црна Гора.
Што се однесува до причините за учество во конфликтот, соговрниците од Македонија во анализата наведуваат дека станува збор за лични убедувања, било да се од верски било од политички карактер.
Неодамна беше објавена вест дека на фронтовите во Сирија загинал и Имер Ниметула(38) од скопското село Грчец. Тој е третата жртва, откако во изминатите месеци уште двајца Албанци од Македонија, од кои едниот бил оџа, загинале во борби како учесници на страна на опозиционите сили.
http://libertas.mk/
