На војската и треба финансиска инфузијаВоено-политичкиот аналитичар Благоја Марковски смета дека АРМ својот домашен авторитет не може да го гради врз основа на донации од странство бидејќи тоа делува негативно не само врз припадниците на АРМ туку и врз населението.
Буџетот на Министерството за одбрана и на АРМ постојано се намалува. Факт е дека за институција како што е војската во чии раце е одбраната на државата, треба да биде одвоен поголем дел од буџетот за да биде на висина на уставната задача.
Тоа подразбира пари кои ќе бидат вложени во модернизација и обука на војската.Неодамна, АРМ доби донација од пет илјади чизми од турската армија, која иако е навистина корисна, сепак во јавноста предизвикува перцепција дека нашите војници се "боси" на боиштата.
Воено-политичкиот аналитичар Благоја Марковски смета дека АРМ својот домашен авторитет не може да го гради врз основа на донации од странство бидејќи тоа делува негативно не само врз припадниците на АРМ туку и врз населението.
-Авторитетот на АРМ не може да се гради врз основа на донации од странство иако добар дел од севкупното оружје и опрема се сведува на донации. Притоа, треба да се има предвид дека донациите кои државите ги даваат од пријателски побуди, тоа се средства со застарена технологија или ресурси кои се при крај на своето траење и сакаат да се ослободат од тие средства. Авторитетот треба да се гради врз база на реално потребните, современи средства и опрема кои треба да се купат на меѓународниот пазар со средства од воениот буџет на државата, смета Марковски.
Според него, средствата кои се користат во моментов во АРМ се застарени, а фокусот во модернизацијата треба да биде на личното и формациското вооружување на припадниците на АРМ.
-Кога зборуваме за современи борбени средства и опрема, ние зборуваме за лично вооружување, но и формациско вооружување. Извршувањето на задачите од војниците е тесно поврзано со опремувањето од аспект дека доколку војникот располага со современи средства и опрема тој психички се чувствува многу посигурен и степенот на неговата обученост доаѓа до полн израз и со високи резултати ги извршува задачите, вели Марковски.
Модернизацијата на армијата влијае на угледот на државата и на меѓународен план. Угледот на АРМ на меѓународен план го изградија војниците кои во мисиите се покажуваат одлично за што сведочат бројните награди, без разлика на фактот што буџетот на армијата е помал од потребните 2 отсто кои ги бара НАТО.
Сепак, доколку АРМ и војниците би биле подобро опремени, задачите би ги извршувале со уште подобри резултати што пак ќе придонесе АРМ да учествува во мисиите на повисоко ниво.
-На АРМ и недостига еден транспортен авион кој може да се користи за транспортирање на трупите во мисии и за внатрешна употреба како и други транспортни возила. Ние и ден-денес се приклучуваме на Германците, САД или на Британците и фактички сме под нивна команда. Вака би можеле да добиеме сопствена мисија во тие меѓународни мисии каде ние би биле одговорни и тоа е подигнување на нивото на доверба од партнерите кон безбедносниот систем на државава, објаснува Марковски и дополни дека меѓународните мисии се важни бидејќи создаваме авторитетна држава која не бара туку дава помош во креирањето на светскиот мир, а најдобрата обука се изведува на право време, во право место со прави средства.
На иста линија е и воено-политичкиот аналитичар Петар Шкрбина кој вели дека приоритетите на АРМ кои се одредени во Белата книга се добри.
-Военото набљудување со ниски летала и оклопните транспортери се најважни за АРМ. Потребни се не еден туку 2-3 транспортни авиони за војската како и да се одвојат ресурси како за набавка на нови хеликоптери така и за репарирање и оддржување на постојните, објаснува Шкрбина.
http://vecer.mk/makedonija/na-vojskata-i-treba-finansiska-infuzija 
