Порака до ЕУ: Ако не нè сакате во унијата, имаме отворена понуда од Русија!Што може да направи Македонија кога има отворени понуди и претензии на Русија кон регионот (Србија, Црна Гора и Македонија), а нема никакви знаци и реакција од Европската унија и НАТО, кога има само шеста препорака од Европската комисија и знае дека нема да добие датум за почнување на преговорите со Унијата, праша пратеникот Александар Николовски од ВМРО-ДПМНЕ, во дискусијата на заедничката седница на Националниот совет за евроинтеграции и комисиите за надворешна политика и за европски прашања кои го анализираа Извештајот на Европската комисија за напредокот на земјава кон ЕУ на која присуствуваше и евроамбасадорот Аиво Орав.
rusija
- Министерот за надворешни работи на Русија, Сергеј Лавров, јасно стави до знаење дека влегувањето во ЕУ на Црна Гора, Русија и Македонија е закана за Русија. Во услови кога постои сериозон пробив на Русија во Црна Гора и изградба на воена база слична на Бондстил во Ниш и кога се очекува невидена парада во Србија за претстојната посета на Путин и нема никаква реакција на ЕУ и НАТО за Македонија, тогаш последиците од овие случувања не може да ги сноси Македонија – рече Николов кој подвлече дека неговата дискусија е далеку поразлична од онаа што ја имаа пратениците пред него и после него.
Тој јавно праша дали е свесна Европа дека „најдобар играч за Русија на Балканот е Грција која не дозволува Македонија да влезе во Европската унија со наметнат спор за името“.
Сличен став имаше и пратеникот од ВМРО-ДПМНЕ, Влатко Ѓорчев, кој потсети дека земјава и нејзините граѓани се изморени од чекањето датум за преговори и исполнувањето на 22-годишната желба да се најдат во европското семјество.
- Македонците се чувствуваат маргинализирани и дискриминирани со тоа што сè уште не сме почнале со преговори и по 22 години отворено изразена желба за ЕУ. Каде е владеењето на правото за Македонија? – праша Ѓорчев и потсети на пресудата од Хаг и препораките на Бадентеровата комисија ангажирана од Европската унија по распадот на СФРЈ.
Одделни негативни делови од Извештајот во својата дискусија оспори професорот Димитар Мирчев, член на Националниот совет за евроинтеграции од Кабинетот на претседателот на државата.
- Нелогични се некои работи, на пример, се оспорува пазарната економија на Македонија, а таа како таква има поголем напредок од дефинираните пазарни економии од Унијата. Има и други нелогичности, но сметам дека во иднина треба да се направи компаративна анализа и квантификација на сите шест извештаи за напредокот, за да се види каде сме како земја – рече Мирчев.
Членовите на Националниот совет за евроинтеграции и двете собраниски комисии главно оценија дека и шестиот Извештај на Европската комисија за напредокот на земјава е реален и земјава треба да се ангажира да ги поправи лошите оценки. Главен акцент во дискусите беше ставан на политичкиот дијалог, слободата на медиумите, меѓунационалните односи и партизацијата на администрацијата.
Дел од пратениците ја повикаа опозицијата да се врати во Собранието и да почне преговори. Пратеничката Солза Грчева, пак, ја повика власта да направи анализа на однесувањата кои довеле до бојкотот на опозицијата.
- Она што се правеше последните две недели во Собранието и надвор од него, говори за нешто друго. Собранието донесе закон со кој ги зголеми платите на административците иако има силни забелешки за администрацијата, донесе закон за одлагање на либерализацијата и покрај тоа што пред европскиот претставник тврдеше дека ќе ја спроведе и донесе закон за градење со кој ги узурпира ингеренциите на локалните самоуправи, кога забелешките за тој однос се многу лоши - рече Грчева.
Насер Селмани од Здружението на новинари подвлече дека ЕУ уште еднаш предочи дека е доведена во прашање демократијата во земјава со лошата оценка за слободата на изразувањето и медиумите.
- Значи онаму каде што Владата ги контролира медиумите и медиумските содржини, нема демократија. Тоа Брисел отворено го кажа во Извештајот. Ако во блиско време не се преземе ништо тоа ќе биде причина наредниот извештај на ЕК да биде негативен за земјава – рече Селмани.
По расправата членовите на комисиите усвоија и заклучоци.
http://ohrigani.mk/poraka-eu-ako-ne-ne-sakate-vo-unijata-imame-otvorena-ponuda-od-rusija/П.С. Штета што европјаниве знаат дека ние не и требаме на Русија и не сме во позиција да се закануваме. Нормално не им требаме и на ЕУ.
