Seal Team Six: Mрачната страна на eдна од најмистериозните и најопасни воени единици
8. ЈУНИ 2015 - 16:34 | Д.П.
Американската единица Seal Team Six најмногу е позната по тоа дека ја изврши акцијата за елиминирање на Осама Бин Ладен, а во последниов период има епитет на единица за глобални потери и справување и елиминирање на разни закани. Сепак во нивните операции често има и цивилни жртви, пишува Independent во најновиот текст за нивните акции.
Тимот кој оперира под името Naval Special Warfare Development Group, морнарицата постепено го зголеми, па сега брои повеќе од 300 „извршители“ на операциите и 1.500 „помошници“ во логистика.
Нивните активности пораснаа како што се засилуваше американската и британската инвазија на Авганистан во 2001 година и немилосрдните операции против талибански борци.
Во периодот меѓу 2006 и 2008 година, членовите на Team Six извршувале 10 до 15 убиства во текот на една ноќ, а понекогаш бројката била и до 25.
Еден извор за New York Times вели дека честите учества во акции, направиле од војниците ладни извршители на кои убиствата по извесно време им станале рутина.
Постојат повеќе акции за кои членовите на Team Six се обвинети дека во текот на задачата убиле и цивили кои немало потреба да бидат убиени, а во текот на истрагата на Joint Special Operations Command некои од нив признале дека биле свесни за цивилните жртви.
„Дали мислам дека имаше смртни случаи кои беа непотребни? Да...“ - стои во извештајот за изјавите на еден од офицерите.
Оваа единица е една од најтаинствените американски воени формации, а истовремено е и најмалку надгледувана, иако имаат зголемен број и опсег на операции.
Харолд Кох од Стејт Департманот потврдил дека операциите на Team Six со години не се под целосна контрола од страна на политичкиот врв.
„Ова е област за која Конгресот не сака премногу да знае“ - вели Кох.
Оваа единица често учествувала во напади над талибанците и нивните тајни скривалишта, па тимот имал многу мали ограничувања во дејствувањето.
Еден од инцидентите во кои настрадаа многу цивили се случил во 2008 година, при акција за елиминирање на талибански водач, во која настрадале голем број цивили во селото во кое се криел водачот. Тоа отвори простор за многу сомнежи дека имало повеќе такви случаи.
http://kajgana.com/seal-team-six-mrachnata-strana-na-edna-od-najmisterioznite-i-najopasni-voeni-edinici
