Не претепаа за ништо!
- Видовме група од десетина луѓе, но не им обрнавме внимание. Кога се доближија, забележавме дека имаат палки во рацете. Еден од нив ми се обрати со зборовите "Вие ли ќе тепате Албанци?", раскажа за Вечер еден од двајцата браќа кои тргнале на прошетка по Кејот на Вардар, а завршиле со тешки повреди во Ургентниот центар
Скршена вилица, нос и прсти, убод со нож... Ова се само дел од повредите кои ги добија двајца скопјани во кукавичкиот напад на разулавени напаѓачи што се случи завчера вечер во населбата Ѓорче Петров. Станува збор за двајца браќа, кои наместо на прошетка по Кејот на Вардар завршија со тешки повреди во Ургентниот центар.
Едниот од претепаните за Вечер раскажа за пеколот низ кој минал завчера вечер.
- Не знам дали сакаа, но многу лесно можеа да не убијат, вели Б.Т. (31) се уште во шок.
Тој и неговиот три години помал брат, Д.Т., околу 22.30 часот излегле од дома за да се прошетаат покрај кејот на Вардар во населбата во која и Живеат. Прошетката за малку ќе имаше трагичен крај. Тие биле пресретнати до група насилници вооружени со дрвени палки и ножеви.
- Видовме група од десетина луѓе, но не им обрнавме внимание. Кога се доближија, забележавме дека имаат палки во рацете. Еден од нив ми се обрати со зборовите 'Вие ли ќе тепате Албанци?", раскажува тој.
Момчињата, знаејќи што ги чека, почнале да бегаат кон населбата, стадионот на фудбалскиот клуб Македонија" и угостителски објект кој е во близина. Но, напаѓачите биле побрзи.
- Буквално на сто метри од сопствената куќа не стигнаа и почнаа да не тепаат. Не удираа со тупаници, клоци и безбол-палки. И јас и брат ми паднавме на земја. Викавме, но тие не престануваа. Продолжија душмански да не удираат додека лежевме. Брат ми го избодоа со нож во грбот, а мене ме удираа со палки по главата, вели нашиот соговорник.
За жал, нивните крици и повици за помош не ги чул никој. Напаѓачите побегнале, а тие целите во крв стигнале до дома и повикале итна помош кој ги пренела во Ургентниот центар.
Дека станува збор за крвничко и брутално претепување сведочат повредите нанесени на двајцата браќа. Постариот има двојна скршеница на вилицата, тешка повреда на носот и скршени прсти, а брат му има тешка повреда на рамото и убод со нож во грбот.
Лекарите успеале да ги санираат повредите кај Д.Т., но морале да извршат интервенција на повреденото рамо. Триесет и едногодишниот скопјанец е задржан на лекување. Според нашите информации лекарите чекаат да спласнат отоците на лицето за да можат хируршки да интервенираат на повредената вилица.
- Никогаш не сум поддржувал насилство ниту пак сум насилен по природа. Никогаш не сум помислил дека може да ми се случи нешто вакво. Сега веќе не знам што да мислам. Ова никогаш нема да можам да го заборавам, раскажува момчето, а шокот и траумата низ која минал можеше да се осетат во неговиот глас.
Тој вели дека последиците од нападот и тој и неговиот брат, но и целото семејство ќе ги чувствуваат уште многу долго.
Во врска со нападот од МВР информираа дека немаат осомничени лица .
Неколку лица од населбата, со кои контактираше "Вечер" тврдат дека ја забележале групата насилници кој дошла од правецот на селото Крушопек и натаму побегнала.
Од невладината "Разбуди се" вчера немаше никаква реакција за овој напад и брутални претепувања. (О.Ч.)
Тепање и во Тетово, демолирање во Скопје
Седумнаесетгодишно момче од Тетово завчера вечер било нападнато од тројца насилници кои брутално го претепале. Инцидентот се случил околу 19.45 часот на улицата "Илинденска", а бил пријавен два часа подоцна од неговите родители. Според изјавата на претепаното момче тројцата напаѓачи му се доближиле и му побарале запалка, за во следниот миг да му се нафрлат удирајќи го со тупаници и клоци по главата и телото. Од тетовската полиција информираат дека засега немаат осомничени лица.
Истовремено во Скопје настрадал автобус на ЈСП, што сообраќал на линијата 65 кон селото Стајковци. На булеварот "Никола Карев" од пешачки надвозник бил фрлен голем камен кој завршил во автобусот во движење и скршил две стакла. За среќа, повредени патници немало. Неколку часа претходно во автобус на истата линија беа нападнати и претепани две момчиња. Полицијата нема осомничени.
Последниот инцидент се случил околу 22 часот, на улицата "Антон Попов" во населбата Ченто, каде што пет шест малолетници на возраст од 14 до 16 години оштетиле десетина возила на кои им ги искршиле ретровизорите.
ОБСЕ ги осудува насилствата
Шефот на Мисијата на ОБСЕ во Скопје, амбасадорот Ралф Брет, вчера ги осуди насилните инциденти и изрази жалење до повредените и нивните семејства. Тој апелираше на брзо наоѓање на насилниците и апелираше до граѓаните да не ја земаат правдата во свои раце.
- Верувам дека властите целосно ќе ги истражат овие инциденти и дека сторителите ќе бидат брзо приведени и изведени пред лицето на правдата. Насилството никогаш не треба да се занемарува, особено во чувствителни мултиетнички средини. Апелирам до семејствата, директорите на училиштата и професорите да внимаваат на нивните деца и ученици и да спречат нивно насилно однесување. Исто така, ги повикувам сите страни, особено политичките партии, граѓанското општество и локалните власти најостро да ги осудат овие акти на насилство, од која било страна да доаѓаат, да делуваат одговорно и да избегнуваат зголемување на тензиите. Одговорното известување на медиумите, исто така, ќе помогне за смирување на ситуацијата, рече Брет.
Полицајци на автобуските во Скопје
Засилени полициски патроли, вклучувајќи ги и припадниците на Единицата за брзо распоредување (ЕБР), вчера можеа да се видат на автобуските постојки низ градот и во близина на средните и основни училишта.
Ова доаѓа по завчерашните најави на министерката Јанкулоска за зголемување на бројот на полицајци на терен особено во реоните каде што се случуваат инцидентите и автобуските линии каде што се случуваа насилничките напади.
Скопскиот градоначалник Коце Трајановски вели дека Градот Скопје постојано и интензивно ги следи случувањата и дека за таа цел во ЈСП "Скопје" е подигнато нивото на мобилност.
Вчера се огласија и од Министерството за образование и наука од каде , исто така, ги осудија инцидентите.
