Веќе со децении единиците на Бундесверот, но и на други армии го користат пушкомитралезот „МГ 3“ во нивните мисии низ целиот свет. Во моментов, компанијата „Rheinmetall“ развива негово надградување во вид на „МГ 3 КВС“. Кон оружјата со кои е опремен Бундесверот секако припаѓа и пушкомитралезот со култен статус „МГ 3“, кој се базира врз пушкомитралезот „МГ 42“ на инженерот Вернер Грунер, чии корени одат уште многу пред Втората светска војна. Кога младата Сојузна Република Германија ги воспоставувала на почетокот на Студената војна своите вооружени сили, уште од самиот почеток било јасно дека најдоброто оружје на сите фронтови од Втората светска војна, треба повторно да стапи во сила. Kомпанијата „Rheinmetall“ започнала во 1957 година во Дизелдорф-Дерендорф повторно сериско производство на „MГ 42“. Прво ќе биде испорачуван под името MГ 42/58, а по измените на одредени детали, и како МГ 42/59, со калибар 7,62 х 51 милиметар. Кон крајот на 1960 година, овие оружја добиваат ознака „МГ 1“. По влегувањето на граничната полиција во германската армија која била вооружена со „МГ 42“ во оригиналниот калибар 7,92 х 57 милиметри била извршена негова адаптација во стандардниот калибар на НАТО и пушкомитралезот добива нова ознака, „МГ 2“, која послужила како основа за „МГ 3“, кој е воведен во 1966 година. Поради супериорната огнена моќ на „МГ 3“ и другите варијанти на „MГ 42“, многу вооружени сили го набавуваат или го произведуваат под лиценца. Во тоа се вклучени Данска, Естонија, Грција, Индонезија, Италија, Иран, Норвешка, Австрија, Пакистан, Португалија, Шпанија и Турција. Турција и Пакистан го произведуваат до ден-денес. За Бундесверот и другите НАТО-партнери, се произведени 139.000 парчиња, пред производството во Германија да заврши во 1979 година. Но, германските вооружени сили сè уште го користат пушкомитралезот „MГ 3“ како колективно оружје – во мисија, на постамент, како коаксијален митралез во борбени возила, како оружје на борбени платформи на далечинско управување, па сè до оружје за одбрана на чамци и бродови во морнарицата. Пушкомитралезот „МГ 3“ во моментов успешно се употребува и во борбите во Авганистан. И покрај докажаната технологија, кај војниците имало и има желби за подобрување на ова оружје. Првото подобрување, практично, било уште за време на новото производство на „MГ 42“ за германската војска, кога се работело на негова подобрена верзија. Тоа бил моделот „МГ 45“. Со ова модификација, пронаоѓачите на пушкомитралезот „МГ 42“, во последните години од Втората светска војна се обидувале да го оптимизираат „MГ 42“. Овој модел со должина од 1.115 mm и 8600 g тежина, бил пократок и полесен од „МГ 42“. Благодарение на соодветна рачка можела да се промени цевката без ракавици и да се извади затварачот нагоре од сандакот. Каденцата била од 800 -1000 куршуми во минута. Меѓутоа, обидите не донеле подобрувања во повоените варијанти на МГ 42, кои би го оправдале сериското производство. Многуте желби од страна на корисниците на овој пушкомитралез за подобрување, производителот „Rheinmetall“ денес ги вградува во проектот МГ 3 КВС (MG 3-Kampfwertsteigerung или MG 3 KWS). Проектот се состои од два комплети за модернизација: комплет за модернизација 1, кој главно вклучува додатоци и комплет за модернизација 2, кој вклучува технички промени во безбедноста и брзината на гаѓање. На денешните комплексни боишта, вооружените сили мора паралелно да укажуваат хуманитарна помош, да вршат мировни задачи и да водат борби со висок интензитет. Препознавањето на потенцијалните закани колку што е можно порано, нивно откривање и идентифицирање и можноста да се совладаат, се одлучувачки повеќе од кога било. Новите воени услови, но исто така и брзиот технолошки напредок, помогнаа модерното рачно вооружување да биде помало, но притоа со поефикасна оптика и оптоелектроника. Не е ни чудо, тогаш, дека и „МГ 3“ треба да добие соодветни опции за нивна монтажа. Првите вакви иницијативи за подобрување биле направени на мали количини на пушкомитралези МГ 3, за употреба во мисија и за обука за распоредување во мисија со вградување на дополнителен сет на оптика/оптроника, така што надградениот МГ 3 е наречен МГ 3A1. Ова надградување вклучувало „Пикатини“ шина која е прицврстена на левата страна на навлаката на оружјето и една на местото на противавионскиот нишан. „MГ 3 KВС“ има повеќе „Пикатини“ шини, на капакот на сандакот, на горната страна и на левата страна на навлаката. Така може да се постават сите стандардни оптички и оптронички средства – вклучувајќи и уред за термичка обработка на слика од системот „германски војник на иднината 2“. За задржување на компактноста на оружјето, само компактните додатоци се покажале корисни. Исто така, и искуствата од употребата покажале дека за оваа оружје, само оптиката со помали зголемувања и без паралакса има смисла. Така, австриските специјалци кои се во мисија во Чад, користат оптички нишан „Aimpoint Comp М4“ со тројно зголемување, прицврстен на капакот на сандакот на нивниот „МГ 74“, австриска верзија на „МГ 42“. Компанијата „Rheinmetall“ неодамна го презентира „МГ 3 КВС“ со компактниот нишан 1-5 x 24 Штајнер. Секој кој го носел „МГ 3“, со сигурност се сеќава со ужас на тоа. За да се поправи ситуацијата, „МГ 3 КВС“ располага со комбинирана рачка за носење. Таа може да се поместува со влечење нагоре и соодветно да се конфигурира. Рачката опционо може да биде насочена кон устата на цевката или кон кундакот или да се свитка надоле под агол од 90 степени. Една нова верзија на рачката е веќе во развој и таа ќе биде малку накосена кон сандакот. Ова овозможува капакот на сандакот лесно да се отвора, дури и кога се монтираат поголеми оптички уреди, без притоа рачката да мора да биде повлечена порано. Друг плус во ергономијата на оружјето е по должина и висина приспособливиот кундак со интегриран гумен одбојник. Така нишанџијата може флексибилно да го прилагоди своето оружје на неговата фигура и опремата која ја носи. Исто така и намалената повратна сила придонесува за прецизноста на оружјето. Приспособливиот по висина потпирач монтиран на долната страна на кундакот исто така ја подобрува прецизноста. Широк и долг ремник изработен од најлон обезбедува удобност при носењето. Ногарките можат да се прилагодуваат по висина за десет сантиметри. Покрај класичната црна боја, се експериментира и со други бои. Со комплетот за модернизација 1, нема промени во функционирањето на оружјето. Но, компанијата „Rheinmetall“ со комплетот за модернизација 2, кој сè уште е во развој има отворена опција за намалување на каденцата на оружјето од 1200 на 600 до 800 куршуми во минута. Ова ќе овозможува подобра контрола врз оружјето. Исто така се планира да биде вграден електронски бројач на куршумите интегриран во ракофатката. Тој би го документирал исто така и оптоварувањето на оружјето и неговите делови. Опционално, се планира и регулатор на огнот како кај австриската јуришна пушка „Штајер АУГ“, со кој огнот се регулира со повлекување на чкрапалото: прво колено – единачен, второ колено – рафален оган. Предноста е таа што при дејство со единечен оган позицијата на нишанџијата може потешко да се открие. Покрај тоа, сосема е разбирливо „MГ 3“ со висококвалитетна оптика да се користи и како замена на снајперска пушка. Засега, во вооружувањето на Бундесверот има уште нешто околу една десетина од првично постоечките „МГ 3“. Ново производство со дополнителни подобрувања, како што е оптимизација на тежината, компанијата „Rheinmetall“ би можела брзо да започне. Но, дали новото издание е исплатливо за германскиот пазар, секако зависи од тоа колку наследникот на „МГ 3“, проектот „МГ 5“, понатаму ќе се развива од страна на Бундесверот. Компанијата „Хеклер и Кох“ во моментов ги испорачува првите 65 показни примероци од својот модерен пушкомитралез ХK 121 на Бундесверот. Компанијата се обидува да започне со сериско производство на MГ 5 во 2015 година. Во моментов, значително намалената оперативна армија, Бундесверот, планира првично опремување со околу 7.000 системи. На подолг рок тоа би можело да биде околу 13.000 и околу една десетина од нивните оригинални МГ 3 за националните одбранбени сили. Дури и со комплетот за модернизација 1 на МГ 3 КВС, чиј развој на прототип е завршен, Бундесверот би можел да ја зголеми својата борбена моќ со децении докажаниот пушкомитралез, сè додека наследникот не почне да го следи по неговите стапки. Покрај тоа, двете надградби треба да предизвикаат голем интерес и кај партнерските земји. Тука „Rheinmetall“ го гледа своето место и може на националните и меѓународните корисници на „МГ 3“ да им понуди целосно одржување на нивното оружје и негово надградување според нивните желби.
