Колкава е македонската воена моќнова македонијаВо моментот кога на глобален план безбедноста никогаш не била на пониско ниво и кога се актуелни повеќе воени судири, а тензиите секојдневно растат на голем број места низ светот, интернет-порталот „Глобал фајерпауер“ неодамна подготви листа на 126 земји рангирани според нивната воена сила.
Порталот извршил и рангирање на државите по континенти и региони. На листата ја нема Македонија. Но, според слободна процена безбедносните експерти со кои се консултиравме, доколку Македонија би била додадена на листата на „Глобал фајерпауер“, таа сигурно би се наоѓала на самото нејзино дно.
Воено политичкиот аналитичар Јордан Тасев не знае зошто Македонија воопшто не е рангирана, но додава дека, покрај нашата земја, од балканските земји во списокот недостига и Црна Гора, која од неодамна е членка на НАТО, а го нема ни соседно Косово.
- Сепак, ако се разгледаат факторите по кои се вршени оцените, мислам дека нашата армија би била на дното од листата, поради фактот дека не сме член на НАТО и ЕУ, имаме мала бројност и на државата и на армијата и нашето вооружување е застарено, а арсеналот на воени орудија ни е ограничен - вели Тасев.
Слична констатација со Тасев има и Милан Стефаноски, кој, пак, додава дека нашите капацитети се дизајнирани со скромни финансии, а ниско сме на скалилото бидејќи целото вооружување што го имаше Македонија за време на СФРЈ беше изнесено од државата при распадот на Југославија.
Според рангирањето на армиите од Балканот, најмоќна армија, со исклучок на Турција, која е меѓу првите десет, има Грција. Таа котира највисоко од регионот и се наоѓа на седмото место. Зад неа е Романија, која е позиционирана на 12-то место, а следуваат Бугарија (19), Хрватска (20), Србија (22), Албанија (23), Словенија (27) и Босна и Херцеговина (28).
Инаку, според она што е напишано во описот на сајтот, рангирањето е извршено според единица мерка наречена индекс на моќ, која произлегува од комплицирани пресметки добиени од информации од јавни извори, како што се веб-порталот на ЦИА, социјалната мрежа Фејсбук, интернет-енциклопедијата Википедија и други. Во рангирањето не се земени предвид нуклеарните способности на оценуваните држави.
- Нуклеарната способност не се зема предвид во пресметките, а пласманот на државите на табелата се базира исклучиво врз потенцијалните на конвенционални способности на армиите на земјите за војување на земја, во воздух и на море. Во пресметките која армија колку е моќна влегуваат вредности поврзани со ресурсите, финансиите и географијата на државите посебно, односно повеќе од 50 различни фактори ја дефинираат конечната добиена вредност за формирање на листата на пласман на „Глобал фајерпауер“- пишува на порталот.
Сајтот објаснува дека на крајниот резултат на неговата листа влијаат и информациите за присуството на природни ресурси, членството во воени и економски сојузи, излезот на државите на море, бројноста на населението, квалитетот на инфраструктурата и конекциските врски со соседните држави, заедно со индивидуалната моќ на локалната економија.
Највисоко на глобалната скала од 126 држави стојат суперсилите САД, Русија и Кина. Следните десет места ги исполнуваат земји како Индија, Велика Британија, Франција, Јужна Кореја, Германија, Јапонија и Турција, а на дното се наоѓаат Сомалија, Централноафриканската Република и Намибија.
Листа на балканска воена моќ во Европа
ранг држава индекс
1. (7) Грција (0,5174)
2. (12) Романија (0,7744)
3. (19) Бугарија (1,0657)
4. (20) Хрватска (1,0733)
5. (22) Србија (1,5868)
6. (23) Албанија (1,8564)
7. (27) Словенија (2,3959)
8. (28) Б и Х (2,8574)
Како се рангираат земјите?
- Рангирањето не се однесува само на количеството вооружување што го имаат земјите туку и на неговата разновидност
- Нуклеарните арсенали не се земени предвид, но се дополнителен аргумент во пресметката
- Географските фактори, логистичката флексибилност, природните ресурси и локалната индустрија влијаат на конечната оценка
- Бројноста на населението придонесува нациите да бидат повисоко рангирани
- Земјите што немаат пристап до море губат поени во рангирањето, бидејќи во својот арсенал оружје немаат морнарица
- Членките на НАТО добиваат бонус од теоретски аспект на делење на воени ресурси
- Моменталното воено и цивилно водство на земјата не е земено предвид во пресметките
