Незавршена приказна во Kичево
ВМРО-ДПМНЕ и СДСМ ја оспоруваат победата на Фатмир Дехари
Kоалицијата на ВМРО-ДПМНЕ и СДСМ за поддршка на Благоја Деспотовски во Kичево вчера поднела приговори за седум избирачки места со кои може да се доведе во прашање победата на кандидатот на ДУИ, Фатмир Дехари. Резултатите во Kичево од завчера ја подгреваат политичката атмосфера, особено откако ДУИ на чело со Али Ахмети со голем концерт го прослави фактот дека со оваа општина прв пат раководи Албанец. Премиерот и лидер на ВМРО-ДПМНЕ, Никола Груевски, вчера ги посети Kичево и партискиот штаб, и тоа во малку напната атмосфера, за да разговара за новонастаната состојба. Беше пречекан од неколку стотици кичевци, од кои дел протестирале, а дел го поддржувале извикувајќи „Kичево е Македонија“.
- Ги разбирам гневот и револтот кај луѓето затоа што тоа е и мој гнев и мој револт. Тие имаат проблеми сега, имаат предизвици, а тоа се и мои предизвици и мои проблеми и затоа сум тука. Дојдов тука во Kичево за разлика од некои други, кои ги немаше ни претходно ни сега, и за разлика од некои што сакаат да создадат раздор и да исполитизираат. Ние остануваме за Kичево, Kичево е Македонија и ќе остане Македонија, а Владата во иднина тројно ќе ги зголеми напорите да им помага на овие луѓе тука, да има повеќе работни места, градби и инвестиции за цел граѓаните да го добијат тоа што го заслужуваат, поквалитетен живот - изјави Груевски пред насобраните, а по средбата со Деспотовски.
На состанокот, како што дознаваме, било разговарано за можностите да се оспори гласањето во некои избирачки места, се разбира таму каде што за тоа има правни аргументи, но и за политички последици од таквите приговори со коалицискиот партнер ДУИ. Сепак, на крајот било одлучено да се оспори гласањето. Според нашите сознанија, се работи за седум избирачки места, од кои четири во Осломеј, две во Зајас и едно во Kичево, каде што постоеле докази за групно и семејно гласање. Според процените, гласовите од овие избирачки места можат да влијаат на изборните резултати и да бидат одлучувачки дали Дехари ќе ја потврди победата или прегласувањето ќе направи пресврт. Претседателката на Општинската изборна комисија, Љтифе Бајрами, вчера ни потврди дека се поднесени приговори од коалицијата за Деспотовски, но како што рече, не може да коментира за кои избирачки места бидејќи била на состанок во Државната изборна комисија. Таа најави дека во законскиот рок од 48 часа приговорите ќе бидат разгледани.
Забелешките на кичевци биле зошто двете партии од македонскиот блок не ја одбрале стратегијата на ДУИ, односно и македонската дијаспора да дојде на гласање. Двете партии деновиве прават анализи каде и зошто не се совпаднале нивните претходни прогнози со изборните резултати. Причината за загубата на Kичево, ВМРО-ДПМНЕ и СДСМ, освен во масовното присуство на албанската дијаспора, ја гледаат и во двојните игри на Демократска партија на Турците на Ќенан Хасипи и на ПЕИ на Фиат Цаноски.
- Според наши пресметки, од дијаспората за Дехари гласале 4.500 иселеници. Ние проценувавме дека максимум што можат да гласаат 2.000 луѓе од дијаспората. Сепак, тоа не беше одлучувачко. Голем удар зададе дволичната игра на коалицискиот партнер Ќенан Хасипи. Тој присуствуваше само на еден митинг и, според наши информации, не пошол кај своето членство за да го насочи да гласа за Деспотовски - вели локален партиски функционер на ВМРО-ДПМНЕ.
Неизвесно е дали ВМРО-ДПМНЕ ќе ја преиспитува понатамошната соработката со партијата на Хасипи. Тој за „Дневник“ негира дека потфрлил во анимирањето за турските гласови во Kичево.
- Не ги контролирам сите Турци во Kичево. Разгранокот на мојата партија беше под контрола и сработи како што треба, во најголем процент беше на линија на коалицијата - ни изјави Хасипи и додаде дека никогаш не играл дволично, но и дека би било несоодветно поради локални случувања да прекине досегашната одлична соработка со ВМРО-ДПМНЕ.
Локалци од СДСМ обвинуваат дека и нивниот коaлициски партнер ПЕИ непринципиелно ја дал поддршката за Дехари наместо за Деспотовски.
Дека не затаиле гласачите од македонскиот блок вчера потврди и Груевски.
- На овие избори излегоа 99 проценти од луѓето што го поддржува кандидатот на ВМРО-ДПМНЕ и коалицијата „За подобра Македонија“ и ќе продолжиме да работиме со сите сили - рече Груевски.
Ситуацијата во Kичево, според него, е создадена во 2004 година, кога се споија пет општини во кои има околу 28 илјади Албанци, а околу 16 илјади Македонци. Портпаролот на ДУИ, Бујар Османи, вчера на прес-конференција се пофали дека Македонците од Пустец гласале за Дехари, со што придонеле првпат по 70 години Албанец да управува со општината. Тој истакна дека дијаспората играла важна улога во решавањето на локалните избори, особено во Kичево. Османи демантира дека на прославата на ДУИ во Kичево Албанци го симнале државното знаме. Според него, тоа паднало поради силниот ветер.
http://www.dnevnik.com.mk/?ItemID=67BAE4CD61A4434C83701202E0576887
