Безбедносните служби на штрек – се очекуваат терористички акции во средината на август!
Македонските безбедносни служби, полициски и воени, се во состојба на засилена подготвеност и раздвиженост, поради зачестените разузнавачки информации дека во северните и западните погранични региони, може да се очекуваат терористички акции, дознава Кирилица од доброупатени извори блиски до безбедносните структури.
Според изворите на Кирилица, македонското разузнавање располага со информации дека се подготвуваат терористички инциденти веќе од почетокот на август, а најверојатно во периодот од 8 до 18 август.
Како можни локации се спомнуваат Липковско-кумановскиот крај, а се посочува и на сомнителни раздвижувања во реонот на Танушевци, изолирано погранично село на границата со Косово, каде почнаа и првите воени активности во кризата од 2001 година. Според истите извори во Липковско и во Танушевци, има значително раздвижување на вооружени паравоени групи, па дури и се спомнува дека функционираат вистински воени кампови, каде милитантите престојуваат и одржуваат обуки.
Во меѓувреме, не запира пишувањето во српските медиуми дека во Македонија може да се очекуваат инциденти. Така, српски Телеграф и други весници пишуваат дека во Липково, на само неколку километри од границата со Србија, група вооружени екстремисти, главно ветерани на ОВК, дошле пред дваесетина дена од Косово и тука формирале воен камп, со цел да им се закануваат на Македонија и Србија!
Поради опасноста од влошување на безбедносната состојба во Македонија, наводно, припадници на специјалните сили на Република Србија веќе подолго време биле распоредени на нивната јужна граница, а гарнизонот во Ниш е под повисока борбена готовност.
Тука биле распоредени делови од специјалната единица „Кобра“ , како и делови од посебната единица “Жандармерија“, што не може да се објасни со најавеното засилување на пограничната контрола поради напливот на мигранти, воведена неодамна, зашто станува збор за специјални единици со поинаква намена.
Околу мотивите за наводните теористички напади постојат неколку претпоставки. Прва е дека дел од милитантни структури на Косово и во Македонија сакаат да се одмаздат за акцијата во Куманово, во која најмалку 10 нивни припадници беа убиени. Веднаш по акцијата беа објавени наводни соопштенија од албански паравоени оргазниации, УЧК, Гарда на Илирида и слични, но нивната автентичност беше сомнителна.
Друг мотив за ваквите акции предочува српскиот генерал Момир Стојановиќ, претседател на комисијата за контрола на безбедносните служби на Србија. Според него, целта е да се отстранат опасните сведоци што може да обезбедат клучни докази против поранешните лидери на ОВК, кои сега се на високи политички позиции во косовските институции. Со ваква мотивација терористи од Косово планирале да спроведат акции во Србија и во Македонија, а според Стојановиќ, таквата заднина е можна и во случајот на кумановскиот инцидент.
Трета и најопасна претпоставка е дека паравоените активности и наводните акции во Македонија се дел од пошироките активности по линија на исламски екстремизам и радикализам. Српски весници со недели наназад пласираат информации за опасностите од исламски радикализам на просторите на Балканот, повикувајќи се и на руски разузнавачки и експертски извори. На овие пишувања неодамна им се придружи и британскиот весник Сандеј Мирор. Весникот, повикувајќи се на разузнавачки извори, објави дека радикалните милитанти од Исламска држава создаваат свое засолниште среде Европа, во Босна и Херцеговина, и дека претставуваат закана за поширокиот балкански регион.
http://kirilica.com.mk/vesti/bezbednosnite-sluzhbi-na-shtrek-se-ochekuvaat-teroristichki
