Кој измислува дека Косовци се доселуваат во западна Македонија?
Обид да се дефокусира јавноста од актуелните настани и проблеми е тврдењето дека Косовци кои ја напуштаат својата земја се доселуваат во Македонија и купуваат имоти, коментира политичкиот аналитичар Мерсел Билали, откако во јавноста проструи информација дека Косовци неконтролирано купуваат имоти во западна Македонија.
Дека нема купувачи на недвижен имот од Косово, тврдат и агенциите за недвижнини од Тетово, Гостивар и од Куманово, кои посочуваат и на законските одредби според кои во земјава странци не можат да купуваат недвижен имот. И од Министерството за внатрешни работи во последниов месец не забележале зголемен број премини на странци преку граничните премини, ниту пак пријава на гости од Косово.
- Ваквите информации се чиста глупост. Овие луѓе бегаат од сиромаштијата што владее во Косово и се прашувам што би барале овде, кога ние сме уште посиромашни. Нема никаква логика во сето тоа. Мислам дека со пласирањето на вакви информации се прави уште еден обид за дефокусирање на јавноста од актуелните настани и проблемите. Се користи една навистина застрашувачка информација од Косово, каде што поради лошата гарнитура на власт, која мисли само на криминалните дејствија и на богатењето, 150.000 луѓе продаваат се и се селат преку Србија и Унгарија во западна Европа, за да обезбеди нормален живот. Нема никакво друго логично објаснување за создавањето проблем онаму каде што го нема, освен како што реков класично дефокусирање на јавноста - вели Билали.
И агенциите за недвижнини и граѓани од Тетово, Гостивар и Куманово со кои контактираше Плусинфо тврдат дека немаат клиенти од Косово кои купуваат недвижен имот, ниту пак има поголема раздвиженост на странци по трговските објекти.
- Нема странци или ако сакате Косовци, кои купуваат имоти во Гостивар и не може да ги има, бидејќи според македонските закони, странец не може да купи недвижнини во земјава. Не сме регистрирале ниту пак некој граѓанин на Косово да бара стан или куќа да изнајми под кирија. Ако би сакале да се доселат во Гостивар, Косовците прво би барале деловни простории, за да отворат сопствени работилници, бидејќи голем дел од нив знаат занаети, па потоа би купувале куќи или станови. Такво нешто нема - вели Агим Стафаи, сопственик на агенцијата за недвижнини „Агим“ од Гостивар.
Тој посочува и дека не забележал зголемен број на Косовци кои престојуваат во Гостивар.
- Да има, како што велите, зголемен број на гости од Косово во Гостивар, би забележал. Би ги имало кај мене, кај брат ми, кај комшиите или во чаршијата, дење да купуваат, а ноќе да се забавуваат по кафулињата. Нема такво нешто во Гостивар. Сите се знаеме и се е вообичаено - вели Стафаи.
Тетовци се чудат што би барале сиромашните Косовци во Тетово, каде што нема работа ниту за неговите жители.
- Цело Тетово и околината е по западна Европа, бидејќи нема работа овде. Што би работеле Косовците кога би се доселиле овде? Да станат уште посиромашни отколку што се сега? - коментира Тетовец.
Исти информации добивме и од агенции за недвижнини и граѓани од Куманово.
- Во Куманово не се издаваат објекти под кирија, а продажбата на недвижнини оди слабо. Досега не сум имал клиент од Косово кој сака да купи стан или куќа, но и да сака, според нашите закони, како странец не може да купи недвижен имот. Нема некоја раздвиженост меѓу граѓаните и во трговскитео објекти. Не се зборува ниту пак дека се доселуваат Косовци, најверојатно е шпекулација - вели Виктор Величковски, сопственик на агенцијата за недвижнини „Премиум лукс“ од Куманово.
Од Министерството за внатрешни работи за Плусинфо изјавија дека последните два месеци не е забележано зголемено присуство на граѓани од Косово во Тетово, Гостивар и Куманово и нема зголемен број на премини на странци на граничните премини.
- Последните 10 дена во земјава преку граничнот премин Блаце влегле меѓу 2.000 и 3.000 странци, во кои можеби има и косовски државјани. Бројката е вообичаена за овој период од годината и нема зголемување на премини во однос на јануари. Нашите служби не забележале ниту зголемен број на пријавен престој и движење на државјани на Косово во Тетово, Гостивар и Куманово - вели портпаролот на МВР, Марија Јаковлевска.
http://plusinfo.mk/vest/14696/koj-izmisluva-deka-kosovci-se-doseluvaat-vo-zapadna-makedonija
