Зошто младите Македонци не сакаат да бидат пилоти?
Центарот за обука на пилоти, еден од најсовремените Центри од овој тип во Европа, денес во касарната во Петровец им овозможи на сите млади лица, заинтересирани да бидат идни пилоти во Армијата на Република Македонија да се запознаат со неговите капацитети и одблиску да ги видат воздухопловите на кои се врши обуката.
- Овој ден е одлична можност да почувствувате барем дел од она што значи да се биде пилот обучуван по најсовремени методи и според врвни услови, во модерен и исклучително технолошки напреден центар, кој е резултат на заложбата на Министерството за одбрана. Наша обврска е внимателно да ги селектираме најдобрите кандидати кои пред сè се чесни луѓе, подготвени за сите предизвици кои ги носи пилотската професија - рече државниот советник во Министерството, Маја Стојановска.
Директорот на Центарот, Израелецот Јаари Шрага, порачувајќи дека еден од главните критериуми да се биде пилот е мотивираноста на кандидатите и нивниот ентузијазам, укажа на следните чекори во селекцијата на кандидатите.
- Последниот ден на пријавување е 30 јуни, по што започнува селекцијата на земја, а следат медицинските и физичките проверки, проверките за познавање на англиски јазик, по што започнува специјализираната обука која трае 18 месеци - информираше Шрага.
Присутните, освен воздухопловите на Центарот за обука на пилоти, ги разгледаа и хеликоптерите Ми-8/17 и Ми-24 кои се дел од летачката флота на Армијата на Република Македонија.
- Единствената наша грижа е да најдеме луѓе кои сакаат да се обидат да станат пилоти. Секогаш се прашувам зошто нема интерес, иако знаат дека има војска и дека имаат еден ваков центар на располагање - вели Шрага.
За Шрага недостатокот на интерес е несфатлив, со оглед на нивото на невработеност во земјата. Курсот е бесплатен, а пилотите веднаш по завршувањето стануваат дел од Армијата или од полицијата. Единствениот услов што мора да го исполнат е да ја имаат завршено првата фаза од високото образование и да бидат помлади од 28 години.http://plusinfo.mk/vest/72515/zoshto-mladite-makedonci-ne-sakaat-da-bidat-piloti
______________________
Si vis pacem, para bellum
