ЦИА им понуди работа на лустраторите
Откако членовите на Комисијата за лустрација успеаја преку викендот за само 24 часа да прочешлаат 5,000 досиеја, дознаваме дека сите членови добиле понуди за работа од ЦИА. Заради таквото ефикасно и експедитивно работење, челниците на најпознатата светска агенција за разузнување без двоумење се решиле да им понудат работни места на високи оперативни позиции во нивната агенција.
- Самиот факт што овој тим, не потценувајќи ја улогата на секој поединец, успеа за толку кратко време да прегледа, провери и одобри толку досиеја, е доволна причина без размислување да им понудиме да се приклучат на нашите тимови кои работат со далеку помала ефикасност – се вели во соопштението од службата за односи со јавноста на ЦИА – Се надеваме дека членовите на лустрациската комисија од Македонија ќе ги пренесат своите знаења и способности на нашите колеги, кои потоа ќе можат да ги употребат во нивната работа. Ова ни е многу важно затоа што во екот на борбата со тероризмот нашите вработени се соочени со голем број досиеја на осомничени, или потенцијални, терористи кои треба да се прегледаат, проверат и соодветно процесуираат-.
Ваквото признание за лустраторите стигна само две дена по нивниот подвиг во кои тие прво примија листа од околу 5,000 кандидати за функции на претстоечките локални избори, ги проследија до соодветните агенции (Агенцијата за разузнавање, УБК, Архивот и Военото разузнавање), од каде добија одговори дали постои сомнеж дека некој на листите бил кодош или пак бил следен од службите. Низ динамична работа, во која моторот на операцијата, беа токму лустраторите, тие успешно ја завршија својата работа и овозможија процесот на подготовка на изборите да продолжи со планираното.
)))
