КОНЕЧНО НЕКОЈА ВЕСТ ОД НАШ ИНТЕРЕС11.04.2016, 17:14
ДА СЕ УНАПРЕДИ ПРОИЗВОДСТВОТО НА ВОЕНА ОПРЕМАЗа разлика од другите екс-ју републики кои ја развиваат наменската индустрија, кај нас и оние капацитети кои ги имавме, се или вон функција или произведуваат ограничен асортиман
Македонија има можности да го унапреди производството на оружје и воена опрема, но за тоа е потребна поголема соработка меѓу постојните фирми и надлежните органи. За разлика од другите земји од поранешна Југославија, кои ја развиваат наменската индустрија, кај нас и оние капацитети кои ги имавме, како Еурокомпозити или Сувенир сега се или вон функција или произведуваат ограничен асортиман производи. Но, таквата состојба може да се смени, бидејќи во земјава има обучен кадар, истакнаа вчера на прес-конференција членовите на новоформираната Групација за оружје, експлозивни и опасни материи, пиротехнички средства и опрема за воена и цивилна намена при Стопанската комора на Македонија. Групацијата е формирана на 23 март годинава и засега има 28 членки, а повеќето од нив се занимаваат главно со трговија.
Во моментов, многу мал дел од производите што влегуваат во делот на вооружувањето и опремата се произведуваат од страна на домашни фирми. Со производство на ваква опрема се занимаваат четири-пет фирми, кои главно произведуваат панцири, шлемови, распрскувачка опрема, димни и гасни гранати, штитови, лансери за ракетни фрлачи и слично. Тоа значи дека најголемиот дел од потребите се задоволуваат од увоз, а само мал дел од домашно производство. Дури и кај муницијата производството е ограничено само на неколку калибри и типови куршуми.
Амбициите на членките на групацијата се во земјава да се привлечат и странски фирми, но за такво нешто се потребни соодветна државна поддршка и одредени бенефиции, односно субвенции по урнекот на странските директни инвестиции во економските зони. Логиката е кога земјата еден ден ќе биде дел од НАТО, според стандардите на алијансата, набавките се вршат од земјите членки, но и дека со оглед на големината на нашата земја, никој нема да влезе во производство само за задоволување на домашниот пазар.
Претседателот на групацијата, Димитар Мангутов, вели дека од интерес за нашата земја е да се привлечат странски фирми од областа на вооружувањето и воената опрема, бидејќи на таков начин ќе се подигне технолошкото ниво, но и стручната подготвеност на вработените.
„Вакви фабрики не можат да бидат лоцирани во постојните индустриски зони, туку за нив ќе треба да се обезбеди посебно место“, вели Мангутов.
При набавката на опрема, исто така може да се бара да се вклучуваат и домашни фирми.
„Со години се зборува за опремување на АРМ со современи транспортери. Но, наместо да се увезат, дел од нив може да се произведат кај нас или барем да се склопат тука“, вели потпретседателот на групацијата, Јовица Ѓуричиќ, додавајќи дека на таков начин може да се стане дел од производниот процес, при што ќе се ангажираат вработени кои истовремено ќе се обучат за одржување на опремата или за нејзина модернизација.
Инаку, основните цели и задачи на групацијата, меѓу другото, се унапредување на работењето и решавањето на тековните проблеми во дејноста, давање мислења и предлози по прашања од заеднички интерес и покренување иницијативи за донесување и за измени во законската регулатива, како и воспоставување поблиска соработка со надлежните органи и институции во земјата. Во таа насока, како што беше истакнато, од посебна важност е соработката со министерствата за внатрешни работи и за одбрана.
„Кај сите членки постои интерес за решавање на прашања поврзани со измени во регулативата, или пак со практичната примена на законски решенија, како што е поефикасно водење и завршување на постапките за издавање одобренија за набавка на оружје, поедноставување на постапките за полагање ловечки испити итн.“, беше истакнато на прес-конференцијата. (М.Ј.)
http://www.utrinski.mk/default.asp?ItemID=53886A0248BCD445B1DEB2AC115F8442 
