Њујоркер: Крвавото минато на ОВК
Лидерите на поранешната ОВК, кои денес се наоѓаат во врвот на политичката структура во Приштина, се осомничени за голем број злосторства врз Србите, пишува американскиот весник Њујоркер.
Во текстот насловен „Покажете ни ги телата“ пишува дека врвот на ОВК се сомничи за организирана трговија со човечки органи и поврзаност со криминални организации низ цела Европа, што засега не е судски докажано.
Познатиот њујоршки неделник на својот сајт објавил подолг текст, еден од ретките што во последните години се занимава со одговорноста на актуелните косовски лидери за најтешките злосторства, и детално опишува што сѐ се случувало на Косово од 1999 година.
Новинарот Николас Шмидл детално ја следел темата за трговијата со човечки органи, прецизно претставувајќи и го на американската јавност целиот случај со „Жолтата куќа“, убиствата на луѓето што требало да сведочат на судењето на Рамуш Харадинај, но на крајот го поставува прашањето „дали тоа ќе може да се докаже“.
„Десетици Срби се осудени за воени злосторства од крајот на војната, но не се само тие одговорни за насилствата. Во Приштина кружат гласини дека во летото 1999 припадници на паравоената ОВК со камиони ги превезувале затворениците во тајни кампови во Албанија, каде што биле мачени, а често и убивани“, пишува американскиот новинар.
Меѓутоа, авторот објаснува дека во врска со тоа на Косово е создадено, како што го нарекува косовскиот новинар Вехби Кајтази, „табу на молчење“.
„Луѓето што го предводеа ОВК и понатаму се присутни на Косово и претставуваат опасност за секој што ќе се реши да прозбори, при што Србите немаат никаква сила, бидејќи се помалку од два отсто од населението. За разлика од Аргентина, Јужна Африка, Сиера Леоне, Косово не создаде сопствена комисија за вистина и помирување“, се вели во текстот.
Шмидл истакнува дека поради тоа работата на откривањето на судбините на исчезнатите главно им била препуштена на оние што живеат надвор од Косово. Еден од нив бил американскиот радионовинар Мајкл Монтгомери, кој претходно пишувал за злосторствата на српските паравоени формации на Косово.
Неколку извори му кажале дека во деновите по поразот на Слободан Милошевиќ на Косово, припадниците на ОВК префрлале „обвинети предавници“ во кампови во Албанија.
„Еден поранешен припадник на ОВК се сеќава дека чувал седум затвореници со лисици на рацете во комби. Кога биле одведени во Албанија, тие биле префрлени во куќа во која имало доктори“, ги пренесува Шмидл информациите до кои дошол неговиот колега.
Кога новинарот Монтгомери помислил дека целата приказна е можеби српска пропаганда, уште тројца поранешни припадници на ОВК му потврдиле дека воделе заробеници во „жолтата куќа“, во близина на албанскиот град Бурел, но дека никогаш не се вратиле по нив.
Тогашната главна обвинителка во Хаг, Карла дел Понте, поднела обвинение против еден од поранешните лидери на ОВК, Рамуш Харадинај, во кој се спомнувало и киднапирање на луѓе што подоцна биле убиени.
Њујоркер истакнува дека Дел Понте не била осамена во своето гледиште на ОВК, истакнувајќи дека поранешниот претставник на претседателот на САД Бил Клинтон, Роберт Гелбард, оваа група ја нарекол „терористичка организација“.
Весникот додава и дека еден од главните луѓе на Интерпол сведочејќи пред американскиот Конгрес во 2000 година изјавил дека ОВК „прошверцувала дрога вредна две милијарди долари во Западна Европа“.
Њујоркер не ги одминува ни убиствата на сведоците што биле спремни на суд да сведочат против косовските лидери.
„Сведокот што се појави на судењето на Даут Харадинај (братот на Рамуш Харадинај) беше убиен. Некои не ни стигнаа да се најдат на листите за сведочење, бидејќи претходно беа убиени“, пишува весникот.
Американскиот весник истакнува дека и покрај информациите до кои дошол известувачот на Европскиот парламент, швајцарскиот пратеник Дик Марти, до 2014 година не треба да се очекуваат резултати од истрагата за трговијата со органи.
Извештајот на Марти на Косово бил доживеан како напад врз таа земја.
„Тоа е напад врз Косово, врз Албанците, врз мене, но и врз САД, ОН и НАТО“, изјавил тогаш актуелниот косовски премиер Хашим Тачи.
Њујоркер пренесува и дека тој тогаш се заканил дека ќе го открие секој Албанец кој учествувал во истрагата на Марти.
Њујоркер го цитира и обвинителот Клинт Вилијамсон, кој ја води истрагата за трговијата со органи кој вели дека голем проблем е тоа што поминало многу време од злосторствата, при што телата била отстранети, снимките избришани, а без физички докази сѐ се потпира на сведочења.
„Едно е да се разговара со новинари или со европратеници, но сосема друго е да се учествува во истрага во која на крајот ќе мора да отидете во судница и со прст да покажете на некои многу моќни луѓе“, заклучил американскиот обвинител.
[You must be registered and logged in to see this link.]