Навивачите ѝ пркосат на ФФМ: „Комити“ и „Чкембари“ ќе направат заедничка фешта на дербито!
3 октомври, 2014 14:06 часот
Навивачките групи на Вардар и Пелистер, популарните „Комити“ и „Чкембари“, заеднички ќе ги бодрат своите клубови на утрешното вечно дерби кое ќе се одигра на стадионот во населбата „Ѓорче Петров“ (15ч.) во Скопје.
Како што дознаваме, скопските тифози ќе ги пречекаат своите колеги од Битола и во заедничко навивачко кортео ќе се упатат кон западниот дел од градот и стадионот каде што ќе се одржи мечот. Доколку се реализира најавата, ова ќе биде првпат во историјата на Македонија две спротивставени навивачки групи заеднички да влезат на стадион.
Фудбалската федерација на Македонија донесе забрана за организирано гостување на навивачи бидејќи овој дуел се смета за меч од висок ризик, но двете најголеми навивачки групи во Македонија се решени да ѝ пркосат на ФФМ. Тие се решени да ги остават сите спротивставености настрана со цел да покажат дека се само вистински навивачи „изгорени“ по својот клуб, кои погрешно се третирани во јавноста и не се хулигани и насилници какви што се претставувани.
Поводот за ваков заеднички „настап“ доаѓа од првото вечно дерби сезонава, на кое еден од „комитите“ остана без три прста поради експлозија на шок-бомба на трибината во Битола. Токму „чкембарите“ беа меѓу првите кои им помогнаа на своите повредени ривали и ги пренесоа повредените навивачи во битолската болница.
Вакви заеднички собири не се невообичаени за другите земји во Европа. Италијанските ултраси често знаат заеднички да протестираат против полициската бруталност и разни одлуки против навивачкото движење на Италијанската федерација. Англиските тифози пред почетокот на оваа сезона заедно протестираа поради превисоките цени на билетите на средбите од Премиерлигата, а слични случаи во минатото се забележани и од најголемите навивачи ривали во соседна Србија, „Делије“ и „Гробари“.
Сепак, најголемиот дел од навивачките здружувања се поради протести и несвојствено е завојуваните групи заеднички да влезат на трибините, како што е најавено за утрешното македонско вечно дерби.
http://sportmedia.mk/navivachite-ke-mu-prkosat-na-ffm-komiti-i-chkembari-ke-napravat-zaednichka-feshta-na-derbito/
