Помешале некој брзини овие од Нова Македонија
Македонија ги дотерува хеликоптерите во пресрет на членството во НАТО
Нова МакедонијаМакедонија ги прави сите неопходни подготовки во пресрет на поканата за членството на нашата земја во НАТО, што, судејќи по дадените изјави на домашните и светските политичари, се очекува да се случи токму во 2018 година. Српските медиуми деновиве објавија дека Македонија се одлучила да ремонтира дел од своето воено воздухопловство во воените погони на оваа земја.
Oваа информација за белградскиот портал „Танго шест“ ја потврдиле од српското министерство за одбрана.
- Имајќи предвид дека станува збор за меѓудржавна работа, не е тешко да се заклучи дека зделката е направена преку компанијата „Југоимпорт СДПР“. Исто така, бидејќи Воздухопловниот институт во Батајница никогаш досега самостојно не работел ремонт на хеликоптерот „ми-17“, најверојатно станува збор за тесна соработка со Русија, бидејќи не се работи само за „ми-17“ туку од Македонија е испратена понова верзија на овој хеликоптер - „ми-171“ - пишува порталот.
Според информациите до кои дојдовме, одредени искуства од новите верзии на рускиот „ми-17“ експертите од воздухопловниот институт имаат стекнато при модификацијата и модернизацијата на хеликоптерите „ми-17-б-5“ и „ми-171-ш“ на воените сили на Ирак, кога е извршено надградување на нивните борбени способности, со инсталирање нова електронска опрема и со вградување ново оружје.
Понатаму, српскиот сервис на Радио Слободна Европа (РСЕ) пишува дека два транспортни повеќенаменски хеликоптери „ми-17“ на македонската војска и полиција пристигнале за ремонт во воздухопловниот институт „Мома Станојловиќ“ во Батајница.
Воздухопловниот институт поседува соодветна опрема да ги ремонтира леталата што се произведени на територија од земјите на поранешниот советски сојуз. Институтот ги надградил своите капацитети за оваа намена во делот од неодамнешната зделка меѓу Србија и Русија за набавка на борбени авиони „миг-29“. За обележување е и изјавата на српскиот министер за одбрана Зоран Ѓорѓевиќ дека тој се надева дека македонскиот пример ќе го следат и другите земји од регионот, а Србија во иднина би можела да прерасне во нов регионален центар за модернизација и ремонт на хеликоптери.
- Се оди во правец овој план бргу да заживее. Прво тоа ќе биде мал регионален центар, кој подоцна би можел да прерасне во голем модерен комплекс, кој ќе ги задоволува потребите на цела Југоисточна Европа - изјави Ѓорѓевиќ.
Повеќе детали за целиот проект не се познати.
Инаку, воздухопловниот институт во Батајница беше уништен во бомбардирањето на НАТО во 1999 година, но потоа, во периодот меѓу 2007 и 2011 година, е комплетно обновен. Во погоните на институтот досега се ремонтирани шест хеликоптери „ми-8“ и два „ми-17“.
Од земјите во регионот, слични летала како Македонија поседува Хрватска, чие воздухопловство има 24 хеликоптери, како и авијацијата на Босна и Херцеговина, со значително помал број на овие летала, а сите овие земји досега во минатото ремонт вршеле во фабрики во Украина, Словачка и во Азербејџан.
Армиски високи воени извори за „Нова Македонија“ брифираат дека за време на воената криза во Украина беше уништен луганскиот авиоремонтен завод, во кој изминативе неколку години се сервисираа македонски хеликоптери, па сега армискиот врв за секој нареден ремонт ќе мора да бара нови сервисери во земји што поседуваат таква воена технологија и се дел од Источна Европа или од поранешниот Советски Сојуз.
Токму затоа што белградскиот институт сега поседува соодветна технологија, но и поради блиските воени и државни врски со Србија, било одлучено ремонтот на леталата да биде извршен кај северниот сосед.
Какви хеликоптери поседува АРМ
Военото воздухопловство и противвоздушната одбрана на АРМ поседуваат дванаесет борбени хеликоптери „ми-24В/К“, четири борбено-транспортни хеликоптери „ми-8мт“, три транспортни хеликоптери „ми-17“ и два повеќенаменски хеликоптера „ух-1х хјуи“.
Хронолошки гледано, АРМ дури на 28 јуни 1994 година ги доби првите свои хеликоптери, кои во најголем дел беа транспортни, од кои дел беше од американско, а дел од руско производство.
