Чл.394-б (Тероризам)
(1) Тој што ќе изврши дело на убиство, телесно повредување, грабнување на лица, уништување на јавни објекти, транспортни системи, објекти на инфраструктура, информациони системи и други објекти во општа употреба, грабнување на авиони или други средства на јавен транспорт, производство, поседување или трговија со нуклеарно оружје, биолошки, хемиски оружја и други видови на оружја и опасни материи, пуштање на опасни радиоактивни, отровни и други опасни супстанции или предизвикување на пожар или експлозија, уништување на постројки за снабдување со вода, енергија или други основни природни извори, со намера загрозување на животот и телото и создавање чувство на несигурност или страв кај граѓаните, ќе се казни со затвор најмалку 10 години или со доживотен затвор.
(2) Тој што јавно повикува, со ширење или ставање на кој било друг начин на располагање на јавноста на порака со која се повикува или поттикнува на извршување на некое од дејствијата предвидени со став 1 и со тоа ќе предизвика опасност за извршување на такво дејствие, ќе се казни со затвор од четири до десет години.
(3) Со казната од став 2 ќе се казни и тој што ќе се договори со друго лице за извршување на делото од став 1, или ќе повика друг да се приклучи кон здружение или група со намера за извршување на делото од став 1.
(4) Тој што организира изработување, подготвува, изработува, продава, купува, пренесува или држи експлозив, огнено оружје или друго оружје или опасни супстанции, наменети за извршување на делото од став 1, како и тој што врши обука или на друг начин подготвува друг за извршување на делото од став 1, ќе се казни со затвор најмалку четири години.
(5) Ако делото од ставовите 2 и 4 го стори правно лице, ќе се казни со парична казна.
(6) Недвижностите искористени и предметите и средствата наменети за подготвување и извршување на делата ќе се одземат.
Член 394-а (Терористичка организација)
(1) Тој што создава група, банда или друга злосторничка организација за извршување на кривични дела на: убиство, телесно повредување, грабнување на лица, уништување на јавни објекти, транспортни системи, објекти на инфраструктура, информациони системи и други објекти во општа употреба, грабнување на авиони или други средства за јавен транспорт, производство, поседување или трговија со нуклеарно оружје, биолошки, хемиски оружја и други видови на оружја и опасни материи, пуштање на опасни радиоактивни, отровни и други опасни супстанции или предизвикување на пожар или експлозија, уништување на постројки за снабдување со вода, енергија или други основни природни извори, со намера загрозување на животот и телото и создавање чувство на несигурност или страв кај граѓаните, ќе се казни со затвор најмалку 8 години.
(2) Припадникот на групата, бандата или друга злосторничка организација, како и тој што помага на кој било начин, ќе се казни со затвор од четири до десет години.
(3) Со казната од став 2 ќе се казни и тој што јавно повикува, поттикнува или поддржува создавање на терористичка организација.
(4) Сторителот на делото од став 1 кој со откривање на организацијата или на друг начин ќе го спречи извршувањето на планираните дела, ќе се казни со затвор од три месеци до три години, а може и да се ослободи од казната.
(5) Сторителот од став 2 кој ќе ја открие организацијата пред да стори во нејзин состав или за неа некое од делата предвидени во став 1, ќе се ослободи од казна.
(6) Недвижностите искористени и предметите и средствата наменети за подготвување на делата од ставовите 1, 2, и 3 се одземаат.
Член 394-в (Финансирање на тероризам)
(1) Тој што обезбедува или собира средства на кој било начин, директно или индиректно, незаконски и свесно, со намера тие да бидат употребени или со знаење дека тие ќе бидат искористени целосно или делумно заради извршување на кривично дело грабнување на воздухоплов или брод (член 302), загрозување на безбедноста на воздушниот сообраќај (член 303), терористичко загрозување на уставниот поредок и безбедност (член 313), терористичка организација (член 394-а), тероризам (член 394-б), злосторство против човечноста (член 403-а), меѓународен тероризам (член 419), земање заложници (член 421) и друго дело на убиство или тешка телесна повреда извршено со намера да се создаде чувство на несигурност или страв кај граѓаните, ќе се казни со затвор најмалку 4 години.
(2) Тој што јавно повикува, со ширење или ставање на кој било друг начин на располагање на јавноста на порака со која се повикува или поттикнува на извршување на некое од дејствијата предвидени со став 1, ќе се казни со затвор од четири до десет години.
(3) Со казната од став 2 ќе се казни и тој што ќе се договори со друго лице за извршување на делото од став 1, или ќе повика друг да се приклучи кон здружение или група со намера за извршување на делото од став 1.
(4) Тој што ќе создаде група или банда што има за цел извршување на кривичното дело од став 1, ќе се казни со затвор најмалку четири години.
(5) Припадникот на групата или бандата, ќе се казни со затвор најмалку пет години.
(6) Припадникот на групата или бандата, кој ќе ја открие групата, односно бандата пред да стори некое кривично дело во нејзин состав или за неа, ќе се ослободи од казна.
(7) Ако делото од ставовите 1, 2, 3 и 4 го стори правно лице, ќе се казни со парична казна.
(
Средствата наменети за подготвување, финансирање и извршување на делата од ставовите 1, 2, 3 и 4 ќе се одземат.
